LOR KESTION TRANSFIZ
Dr. Nuvin Ramgoolam finn remet kestion transfiz lor azanda diskision e bann reaksion pe kras dife kouma "petartifis".
Dan lentelizans kolektif enn transfiz se enn depite (ou konseye) ki finn eli ar tiket enn parti e apre so eleksion li desid pou sanz parti. Bann ki kont sa pratik la, zot dir ki depite la bizen demisione pou rod enn nouvo manda. Sa pou mwa li normal dan kad moralite politik. Me ena osi ki dir ki bizen pas enn lalwa ki obliz enn transfiz demisione kom depite ousa konseye. Lider lopozision, Paul Berenger, ena rezon dir ki bizen fer atansion parski lalwa la li bizen respe bann prensip demokratik ek Konstitision Repiblik Moris.
Kan enn dimoun pret serman dan Parlman li fer li antan ki enn sitwayen ki reprezant enn sirkonskripsion. Dan so serman peyna okenn mansion parti ki ti donn li tiket. SO LWAYOTE DEPANN NET LOR SO PROP KONSIANS. Dayer ena bann ka kot so LIBERTE PANSE EK EXPRESION gagn priyorite lor tou lezot konsiderasion.
Dan enn sitiasion ideal enn depite bizen res fidel ar program ki finn permet li gagn vot bann elekter dan so sirkonskripsion. Si li nepli dakor, li so devwar al ver elektora pou dimann enn nouvo manda. Me ki arive si so parti sanz program apre eleksion? Se pa so parti ki bizen al ver elektora pou enn nouvo manda? Eski li'si li oblize demisione mem si li finn res lwayal ar program ki finn fer li gagn eleksion?
Olie al rod lalwa pou bar larout transfiz - mision enposib! - eski li pa pli prodiktif ki bann parti politik devlop enn kiltir anti-transfiz? Detrwa kestion kikfwa kapav fer nou reflesi lor sa kestion la.
Ki bann kriter seleksion bann parti politik servi pou zot rekritman kandida? Servi konpetans, solidite ideolozik, angazman, partisipasion aktif dan lavi parti? Ousa kominote, kars ek kontribision finansie?
Eski bann parti ena zot Sant Formasion pou donn zot manm enn treyning solid pou ki zot kapav fer zot travay kouma bizen? Ousa ramas brit-brit kandida ar profil kominal ideal?
Eski labaz parti la ena pouvwar konteste desizion lider ek biro politik? Eski ena vre demokrasi alenteryer bann parti politik?
Aret rod boukemiser! Problem la so rasinn li dan febles nou kiltir politik.
Dev Virahsawmy
24.03.08
LAKAZ KONTENI NOUVO2008