©Dev Virahsawmy
All rights reserved
| ZOZO MAYOK |
| CHANNDA MAMA |
| ZISTWAR EZOP |
Lera Miske
Trwa ti lera miske
Get kouma zot galoupe
Zot tou galoup deryer enn marazinn
Ki koup zot lake ar kouto lakouzinn
Trwa ti lera miske
Trwa ti kanar bwate
Get kouma zot patouye
Zot tou patouy deryer enn longanis
Ki pers zot latet ar enn tournavis
Trwa ti kanar bwate
Trwa ti toutou roke
Get kouma zot sot-sote
Zot tou sot-sot deryer enn depite
Ki fann zot zorey ar so gran lepe
Trwa ti toutou roke
Trwa ti lera miske
Get kouma zot galoupe
Zot tou galoup deryer promosion
Ki bous zot labous ar enn gro bouson
Trwa ti lera miske
Tonton, Tonton
Tonton, tonton ar ou lenz set kouler
Ou seve blan, ou lizie lalimier
Tonton, tonton ar ou sourir frengan
Dir mwa ki ena lot kote brizan
Ou ki finn travers lamer ek lezer
Lwen-lwen laba dan Zimbabwe
Enn baba ti pe bwar dile
Dan lebra so mama Zoulou
Enn solda fou ar so zouzou
Desir lesiel kouma zekler
Ti petal rouz grenn lor later
Lwen-lwen laba dan Baroda
Enn baba ti pe rod nana
Li mars katpat dan lapousier
Pou plen so vant li manz later
Enn gro misie ki pe pase
Fer koumadir li pa trouve
Tonton, tonton ar ou lenz set kouler
Ou seve blan, ou lizie lalimier
Tonton, tonton ar ou sourir frengan
Dir mwa ki ena lot kote brizan
Ou ki finn travers lamer ek lezer
Lwen-lwen laba dan Manchester
Enn baba tousel dan so ber
Pe plore, li pe rod so bwar
So mama bien malad mo kwar
Vwazen pa tann so dezespwar
Zot zwe radio for touleswar
Lwen-lwen laba dan Washington
Enn baba fek vinn dan lemonn
Lor peron pale prezidan
So plore nwaye dan divan
Bann pasan pase pa gete
Zot tou prese, napa koste.
Tonton, tonton ar ou lenz set kouler
Ou seve blan, ou lizie lalimier
Tonton, tonton ar ou sourir frengan
Dir mwa ki ena lot kote brizan
Ou ki finn travers lamer ek lezer
Dile Kaye
Mo pas lari delli
Mo zwenn tifi Devi
Pe fini so lavi
Dal, douri, satini
Devi ki to vande
Mo vann dile kaye
So bidon lor so latet
So kar dan so lame
Mo pas lari degol
Mo zwenn garson Tipol
So mama finn vinn fol
So papa dan lazol
Tipol ki to vande
Mo vann dile kaye
So bidon lor so latet
So kar dan so lame
Mo pas lari hongkong
Mo zwenn ti Wongtongchong
Bann gong pe fer dingdong
Tongchong pa per kingkong
Tongchong ki to vande
Mo vann dile kaye
So bidon lor so latet
So kar dan so lame
Mo pas lari bangla
Mo zwenn ti Moustafa
Laba lerwa bien gra
Kalifa abdala
Tafa ki to vande
Mo vann dile kaye
So bidon lor so latet
So kar dan so lame
Mo pas lari malgas
Mo zwenn zanfan Dikas
Bann fangas ramas kas
Dikas nouri so vas
Dikas ki to vande
Mo vann dile kaye
So bidon lor so latet
So kar dan so lame
Siter Siter Panari
Letan mo ti enn zanfan
Enn zour mo dimann mo mama
Kifer bizen swiv seki gran
Dir mwa, dir mwa vit do mama
Lalinn li tourn otour later
Later li tourn otour soley
Siter-siter panari
Lakle bidon dan lari
Pli tar letan mo al lekol
Enn zour mo dimann profeser
Kifer zot dir nou dan lekol
Nou bizen ekout profeser
Lalinn li tourn otour later
Later li tourn otour soley
Siter-siter panari
Lakle bidon dan lari
Ler mo finn koumans al travay
Enn zour mo dimann mo patron
Dir mwa ou kifer dan travay
Nou bizen ekout lord patron
Lalinn li tourn otour later
Later li tourn otour soley
Siter-siter panari
Lakle bidon dan lari
Mo zanfan dimann mwa aster
Kifer depi letan ansien
Sef dan lakaz li fer fezer
Mo repet zot ansien refren
Lalinn li tourn otour later
Later li tourn otour soley
Siter-siter panari
Lakle bidon dan lari
Ayo Do Mo Bayo
Ayo do mo bayo
Ayo do mo matlo
Kostim kaki per fer parad
Gro bogi nwar pe fer lefrayt
Dan zarden Madam Labonte
Akoz sa lerwa la
Tambi kit mo lakaz
Banndouk lor so zepol
Kouto lor so leren
Kifer to kit mwa Tambi
Kifer to kit mwa
Ayo do mo bayo
Ayo do mo matlo
Bann bouke fler pe fer parad
Bann minisprens pe fer lefrayt
Dan zarden Madam Santoupe
Akoz sa lerwa la
Tambi kit mo lakaz
Li vwayaz lor zepol
Kouver ar enn pavion
Kifer to kit mwa Tambi
Kifer to kit mwa
Lili Bato
Ani mo gate Ani mo koko
Reste dormi dir twa reste dormi
Ani mo gate Ani mo koko
Reste dormi lor mo lili bato
Rwayalo Rwayalo do mo koko
Kot to travay dir mwa ki to travay
Rwayalo Rwayalo do mo koko
Lerla nou dormi lor lili bato
Ani mo gate Ani mo koko
Mo pe al travay lot kote dilo
Mo retourne ar boukou lamone
Lerla nou dormi lor lili bato
Rwayalo Rwayalo do mo koko
Kifer to pe al lot kote dilo
Rod enn ti travay sa kote dilo
Napa ale reste do mo koko
Ani mo gate Ani mo koko
Kot pou gagn travay sa kote dilo
Ani mo gate Ani mo koko
Atann mwa tousel lor lili bato
Rwayalo Rwayalo do mo koko
Reste dormi dir twa reste dormi
Rwayalo Rwayalo do mo koko
Nou va dormi lor nou lili bato
Granmer Tatann
Lor gran sime fale get li
Li sem terer dan tou lespri
Seki piti seki pli gran
Dan so prezans bliye zot ran
Granmer Tatann chom so baton
Tou bann marmay zot sot miray
Fay pat san kler met sime kler
Zot kas pikan tas dan siendan
Enn swar Beber gran triyanger
Sey koken fri zarden belmer
Enn kout baton lor so ledo
Ayo ayo big-big loyo
Granmer Tatann chom so baton....
Rapel Deven gourman lakrem
Li rod fer pak avan karem
Granmer Tatann bien kenn so senn
Tini so renn devir so yenn
Granmer Tatann chom so baton....
Konper Yaya Galimacha
Souk farata dan katora
Granmama get so sinema
Akout dibwa tansion twa la
Granmer Tatann chom so baton....
Granmer Tatann gardie loner
Li prefer res selibater
Pou tengn saler zenes anfler
Li sem terer dan tou leker
Granmer Tatann chom so baton....
Mersi Mama
Lor so latet gamel dilo
Pe vers bann gout lor so lizie
Lor so latet gro pake lerb
Kraz so oter kas so leren
Ar so lame li pe chombo
Enn ti marmay fek konn marse
Li mont lapant enn vie santie
Kot tras lipie pa efase
Tou bann marmay nou antoure
Nou sant ansam mersi mama
Lor so latet pake dibwa
Kabos so rev rey so figir
Lor so latet bake lenz prop
Kourb so ledo touf so likou
Ar so lame li pe chombo
Enn ti marmay fek konn marse
Li mont lapant enn vie santie
Kot tras lipie pa efase
Tou bann marmay nou antoure
Nou sant ansam mersi mama
Poem fet Mama 2
Soley al dormi pli boner
Divan soufle freser liver
Pie flanbwayan peyna kouler
Me twa to la zoli mama
Ser mwa bien for dan to lebra
Pie mang dan lakour li touni
Nou pie leksi napeyna fri
Fler goyavie pa finn fleri
Me twa to la zoli mama
Ser mwa bien for dan to lebra
Deor ti lapli pe frete
Labrim pe fann partou kote
Lalinn zetwal finn emigre
Me twa to la zoli mama
Ser mwa bien for dan to lebra
Mem si deor freser frete
Si marenwar liver tale
Zordi nou ge nou tou ere
Ala enn korbey poezi
Ki finn fleri pou dir mersi.
Ti Rajou
enn papyo zonn lor en fey ver
pe kas poz dan soley liver
tl rajou tourn vit so ledo
ayo so lespri lor tablo
kot to pe ale mo bayo
kifer to prese do matlo
mo pe al lekol pou aprann abesede
mo pe al lekol pou mo vinn
enn gran misie
pa tro lwen enn seren safran
pe soufle so refren frengan
ti rajou ferm vit so zorey
ayo so lespri pa parey
kot to pe ale mo bayo
kifer to prese do matlo
mo pe al lekol pou aprann
anglefranse
mo pe al lekot pou mo vinn
enn gran misie
boukie banane rouz anfler
so fler pe parfim liniver
ti rajou bes vit so lizie
ayo so lespri finn vinn vie
kot to pe ale mo bayo
kifer to prese do matlo
lefrayt lefrayt
mo bizen konn mo tab par ker
defwadekat
slnon mo pou pey sa bien ser
Lapli Tonbe, Zariko Pouse
Ti pwason rouz ki to kone
Dan to basen kouma to ge.
To lake balans-balanse
To lekay nak pe briy-briye;
To bien kontan, to bien kontan,
To pran to basen pou losean.
Lapli tonbe, zariko pouse,
soley kouse, lalinn leve;
Lapli tonbe, zariko pouse,
miray grene, lasenn kase.
Ti krapo gri ki to kone,
Dan to danpi kouma to ge;
Dan bor dilo to pe flote,
To lizie kler pe briy-briye,
Lesiel lao li enn ti ron,
To kwar samem nou lorizon.
Lapli tonbe, zariko pouse,
soley kouse, lalinn leve;
Lapli tonbe, zariko pouse,
miray grene, lasenn kase.
Ti kakatwa ki to kone,
Dan to volyer kouma to ge,
Kronk-kronke imit-imite,
To plim kolorye listre,
To viv lavi sivilize
To'ena lasenn dan to lipie.
Lapli tonbe, zariko pouse,
soley kouse, lalinn leve;
Lapli tonbe, zariko pouse,
miray grene, lasenn kase.
Twa ti baba ki to kone,
Dan to lakaz kouma to ge,
Riy-riye, badinn-badine,
Deor laseren pe tonbe,
To tipti nik pe vinn sere,
Laport to nik finn defonse.
Lapli tonbe, zariko pouse,
soley kouse, lalinn leve;
Lapli tonbe, zariko pouse,
miray grene, lasenn kase.
zozo mayok tipti-tipti
bat-bat lezel, mizir lesiel,
ale-vini, poz-poz lor brans,
bek-bek enn nik pli gro ki li.
ti kou ti kou touy loulou,
baton piondenn pou lougarou
titalber gagn maloker
tiklaketik dendenkouden.
get fourmi nwar tipti-tipti,
travers motagn, travers dezer
ti pa ti pa li deplase,
me so lemonn li transforme.
ti kou ti kou touy loulou,
baton piondenn pou lougarou
titalber gagn maloker
tiklaketik dendenkouden.
get enn karya tipti-tipti
tripot dibwa pli gro ki li,
li touk-touke, li manz-manze
sato lerwa vinn lapousier.
ti kou ti kou touy loulou,
baton piondenn pou lougarou
titalber gagn maloker
tiklaketik dendenkouden.
get sa seni tipti-tipti
bouz dan feyaz dousma-dousma,
glipe, glipe ver lavenir
enn papyon kouler lalimier.
ti kou ti kou touy loulou,
baton piondenn pou lougarou
titalber gagn maloker
tiklaketik dendenkouden.
O Dek
O dek! Enn serendikap ek enn kardinal
Pe kourtize lor enn brans filao.
O dek! Trwa ti lapen blan ar zot lizie rouz
Pe zwe-zwe lor lerb ver dan bor dilo.
O dek! Kat tipti pousen blan, nwar, zonn, maron
Ansam pe fouy later pou rod lever.
Bat to tanbour tanbourye!
Tap to ravann ravannye!
Les lapo kabri gazouye!
O dek! Enn bengali pe sante lor enn fler,
Ki leze kouma enn papyon dore.
O dek! Fler kann velour pe danse dan lezer,
Li pe valse ar lamizik lesiel.
O dek! Zwazo kolorye gazouy-gazouye
Pe patine lor ledo larkansiel.
Bat to tanbour tanbourye!
Tap to ravann ravannye!
Les lapo kabri gazouye!
O dek! Niaz pe anvlop montagn ar so kares,
So lonbraz pe rafresi tou bann fler.
O dek! Enn boul dife lor pe al bwar dilo,
So kouler pe pentir nou liniver.
O dek! Lalinn kouler larzan pe zwe yoyo
Ar bann zetwal diaman lao-lao.
Bat to tanbour tanbourye!
Tap to ravann ravannye!
Les lapo kabri gazouye!
TIBOUT
Ti-Bout kriye,
Ouver lizie.
Lekzistans flou,
Bien-bien frazil
Kal so regar.
Kisasa sa?
Kisasa sa?
Tapaz-tapaz
Alime-tengn?
Kisasa sa?
Kisasa sa?
Zafer-zafer
Koz-koz kouler?
Alime-tengn,
Koz-koz kouler
Kal so regar.
Ti-Bout kriye
Bous so lizie,
Boud so boude,
Rod so tete.
KOUK! ALA MO LA!
Ti-zwazo
Kouler lalimier
Tok-tok lor vit
Mo lafnet.
Kouk!
Ala mo la.
CHANDA-MAMA
Chanda-Mama lao
Enn soukoup dan dilo
Enn koko san fetaz
Ekleraz dan lonbraz
Chanda-Mama lao
Chanda-Mama lao
Enn soukoup dan dilo
Fanal pal-pal aswar
Ekler somey dan nwar
Chanda-Mama lao
Chanda-Mama lao
Vey mwa kan mo dodo
Tres enn kolie petal
Ar diaman bann zetwal
Chanda-Mama lao
RAKONT ENN ZISTWAR
Gramaten kouma mo leve,
So ti latet lor mo lorye,
Li nek pionn mwa dan kwan lizie;
Mo dimann li ki li ole.
Papa rakont mwa enn zistwar
Kouma fourmi touy lelefan,
Kouma ti-nen ti touy zean.
Papa rakont mwa enn zistwar.
Letan mo al kit li lekol,
Li kol ar mwa kouma lakol;
Lor so zepol mo poz lame;
Mo dimann li ki li ole.
Papa rakont mwa enn zistwar
Kouma fourmi touy lelefan,
Kouma ti-nen ti touy zean.
Papa rakont mwa enn zistwar.
Ler mo retourn lakaz tanto
Mo donn li enn ti sak gato.
Me zis gato napa ase;
Mo dimann li ki li ole.
Papa rakont mwa enn zistwar
Kouma fourmi touy lelefan,
Kouma ti-nen ti touy zean.
Papa rakont mwa enn zistwar.
Aswar avan li al dormi
Li apel mwa kot so lili;
Li fixe mwa ar so lizie;
Mo dimann li ki li ole.
Papa rakont mwa enn zistwar
Kouma fourmi touy lelefan,
Kouma ti-nen ti touy zean.
Papa rakont mwa enn zistwar.
Enn zour mo'al dimann mo papa
Kifer toultan sa garson la
Ale-vini rod mem koze?
"Li finn swiv twa, ki to ole?"
Papa rakont mwa enn zistwar
Kouma fourmi touy lelefan,
Kouma ti-nen ti touy zean.
Papa rakont mwa enn zistwar.
BONOM NOEL
Laba lor bor montagn koste akot dilo
Tou zanfan eksite, zot pe pans zot kado.
Depi soley leve ziska zot al dormi
Zot nek pans Bonom Noel ki pou pas zis minwi.
Bonom Noel, Bonom Noel pa bliye mo kado;
Bonom Noel, Bonom Noel mo'le enn mekano.
Mo finn bros mo soulie, li anba mo lili.
Bonom Noel pa bliye mo'nn dimann enn fizi,
Enn loto fer rali, enn avion anvole.
Bonom Noel pa bliye mo'nn dimann enn poupe,
Enn poupe ki koze, enn bwat zouzou menaz.
Bonom Noel, Bonom Noel pa bliye mo lakaz.
Laba kot laboutik zot nene lor vitrinn;
Dan enn soukoup volant zot lespri lor lalinn;
Laba kot pie sapen zot lizie pa bate;
Enn poupe mars ar pil pe dir zot namaste.
Bonom Noel, Bonom Noel pa bliye mo kado;
Bonom Noel, Bonom Noel mo'le enn mekano.
Mo finn bros mo soulie, li anba mo lili.
Bonom Noel pa bliye mo'nn dimann enn fizi,
Enn loto fer rali, enn avion anvole.
Bonom Noel pa bliye mo'nn dimann enn poupe,
Enn poupe ki koze, enn bwat zouzou menaz.
Bonom Noel, Bonom Noel pa bliye mo lakaz.
Bann paran trouv bien drol bann zanfan pa pe fen;
Bann rev zoli sirpriz finn fer zot vant bien plen;
Zot limazinasion finn koup zot lapeti;
Aswar mem finn fer tar zot pa ole dormi.
Bonom Noel, Bonom Noel pa bliye mo kado;
Bonom Noel, Bonom Noel mo'le enn mekano.
Mo finn bros mo soulie, li anba mo lili.
Bonom Noel pa bliye mo'nn dimann enn fizi,
Enn loto fer rali, enn avion anvole.
Bonom Noel pa bliye mo'nn dimann enn poupe,
Enn poupe ki koze, enn bwat zouzou menaz.
Bonom Noel, Bonom Noel pa bliye mo lakaz.
Bann zanfan finn tir plan pou fer sanblan dormi,
May Bonom Noel anplen ler li vini minwi;
Me ler minwi sone bann zanfan pe reve:
Otour enn pie sapen zot pe sant zot sante.
Bonom Noel, Bonom Noel pa bliye mo kado;
Bonom Noel, Bonom Noel mo'le enn mekano.
Mo finn bros mo soulie, li anba mo lili.
Bonom Noel pa bliye mo'nn dimann enn fizi,
Enn loto fer rali, enn avion anvole.
Bonom Noel pa bliye mo'nn dimann enn poupe,
Enn poupe ki koze, enn bwat zouzou menaz.
Bonom Noel, Bonom Noel pa bliye mo lakaz.
KI KALITE
Ki kalite!
Lor enn gro ros pe asize.
Enn ti solda
Ki kalite!
Li kwar limem gran kalipa.
Si mo ti gran, si mo ti for
Mo ti pou kas tou bann rekor;
Bann krab karle tou kalite
Ti pou asiz kot mo lipie.
Si lamer ti bwi
Tou pwason ti'a kwi;
Si to latet ti enn deksi
Ti pou servi pou kwi diri;
Si to latet ti enn karay
Ti pou servi pou fer rougay;
Si to latet ti enn goble
Ti pou servi pou bwar dite.
Enn payanke
Ki kalite!
Dan lesiel ble pe traverse.
Enn kankrela
Ki kalite!
Li quar limem gran kalipa.
Si mo ti gran, si mo ti for
Mo ti pou kas tou bann rekor;
Bann payanke tou kalite
Ti pou asiz kot mo lipie.
Si lamer ti bwi
Tou pwason ti'a kwi;
Si to latet ti enn deksi
Ti pou servi pou kwi diri;
Si to latet ti enn karay
Ti pou servi pou fer rougay;
Si to latet ti enn goble
Ti pou servi pou bwar dite.
Enn goramie
Ki kalite!
Dan dilo kler ti pe naze
Enn ti kourpa
Ki kalite!
Li kwar limem gran kalipa.
Si mo ti gran, si mo ti for
Mo ti pou kas tou bann rekor;
Bann goramie tou kalite
Ti pou asiz kot mo lipie.
Si lamer ti bwi
Tou pwason ti'a kwi;
Si to latet ti enn deksi
Ti pou servi pou kwi diri;
Si to latet ti enn karay
Ti pou servi pou fer rougay;
Si to latet ti enn goble
Ti pou servi pou bwar dite.
BANANE
Pie flanbwayan kouver ar fler;
Bann pie leksi ranpli ar fri;
Lalimier ble dan lesiel ge
Pe donn nesans nouvo lane.
Banane, banane!
Vini zanfan nou trap lame,
Nou fer laronn pou nou danse;
Banane, banane,
Nou pas leponz lor lepase,
Ansam nou bwar enn lasante;
Banane, banane,
Zordi lavi rekoumanse,
Vini zanfan nou trap lame.
Refren moulen lafen lakoup;
Bann karo kann ki pe re-ne;
Sante zwazo lor pie lao
Pe donn nesans nouvo lane.
Banane, banane!
Vini zanfan nou trap lame,
Nou fer laronn pou nou danse;
Banane, banane,
Nou pas leponz lor lepase,
Ansam nou bwar enn lasante;
Banane, banane,
Zordi lavi rekoumanse,
Vini zanfan nou trap lame.
Gran netwayaz partou kote;
Makiyaz fre lor bann lakaz;
Tou bann salte ki pe brile
Pe donn nesans nouvo lane.
Banane, banane!
Vini zanfan nou trap lame,
Nou fer laronn pou nou danse;
Banane, banane,
Nou pas leponz lor lepase,
Ansam nou bwar enn lasante;
Banane, banane,
Zordi lavi rekoumanse,
Vini zanfan nou trap lame.
Bann zanfan ki pe sey lenz nef
Pou al vizit zot gran paran;
Bann zanfan ge ki pe sante
Pe donn nesans nouvo lane.
Banane, banane!
Vini zanfan nou trap lame,
Nou fer laronn pou nou danse;
Banane, banane,
Nou pas leponz lor lepase,
Ansam nou bwar enn lasante;
Banane, banane,
Zordi lavi rekoumanse,
Vini zanfan nou trap lame.
LAKAZ ZOUZOU
To rapel letan lontan,
Twa ek mwa ti'ankor zanfan.
Touletan apre lekol
Kouma gran nou zwe nou rol
Ansam dan lakaz zouzou.
Anou zwe lakaz zouzou!
Ar later nou fer ladou,
Lakasia vinn samousa,
Dilo pir vinn alouda.
Anou zwe lakaz zouzou!
To rapel enn zour lete
Nou desid pou nou marye.
Touletan peyna lekol
Kouma gran nou zwe nou rol
Ansam dan lakaz zouzou.
Anou zwe lakaz zouzou!
Ar later nou fer ladou,
Lakasia vinn samousa,
Dilo pir vinn alouda.
Anou zwe lakaz zouzou!
Aster get nou bann zanfan
Parey kouma nou lontan.
Touletan apre lekol
Kouma gran zot zwe zot rol
Ansam dan lakaz zouzou.
Anou zwe lakaz zouzou!
Ar later nou fer ladou,
Lakasia vinn samousa,
Dilo pir vinn alouda.
Anou zwe lakaz zouzou!
ASWAR FER NWAR
Mama vremem lontan-lontan,
Avan soley, avan divan
To lekor ki ti sarye mwa,
To disan ki ti nouri mwa?
Soley briye, lapli tonbe,
Divan soufle, lesiel riye
Mama res la koste ar mwa,
Aswar fer nwar kan to pa la.
Mama vremem kan mo ti ne
Dan to lizie larm ti koule;
To ti met mwa kot to leker
Pou resof mwa ar to saler?
Soley briye, lapli tonbe,
Divan soufle, lesiel riye
Mama res la koste ar mwa,
Aswar fer nwar kan to pa la.
Mama vremem enpe apre
Ler mo ti koumans gazouye,
Mo premie mo li ti 'mama';
Mama dir mwa si vremem sa?
Soley briye, lapli tonbe,
Divan soufle, lesiel riye
Mama res la koste ar mwa,
Aswar fer nwar kan to pa la.
Mama vremem kan premie fwa
Mo ti rod fer mo premie pa
To ti tike, to ti pe per
Tansion ariv mwa enn maler?
Soley briye, lapli tonbe,
Divan soufle, lesiel riye
Mama res la koste ar mwa,
Aswar fer nwar kan to pa la.
Mama vremem kan mo vinn gran
Mo 'si mo pou ena zanfan
E parey kouma mwa mama
Zot pou sant mwa sa sante la?
Soley briye, lapli tonbe,
Divan soufle, lesiel riye
Mama res la koste ar mwa,
Aswar fer nwar kan to pa la.
MIAW, MIAW!
Gramaten kouma mo somey kase
Mo minou blan ek nwar ronfle, ronfle;
So lizie eklre briye dan nwar
Vinn dir mwa degaze mo anretar.
Miaw, miaw degaze, degaze!
Miaw, miaw kifer to pe tarde?
Miaw, miaw, degaze, degaze!
Miaw, miaw mo kontan to gate!
Miaw, miaw degaze, degaze!
Ler mo pe prepare pou al lekol,
Li asiz trankilman lor mo zepol;
So moustas bouz-bouze ar kontantman
Ler mo sey depoz li li pa kontan.
Miaw, miaw degaze, degaze!
Miaw, miaw kifer to pe tarde?
Miaw, miaw, degaze, degaze!
Miaw, miaw mo kontan to gate!
Miaw, miaw degaze, degaze!
Ler tanto mo retourn lakaz kot mwa
Mo minou fer komik. Enn tamasa!
Li redi so lekor kouma lastik;
Mo kone li pe rod enn bout disik.
Miaw, miaw degaze, degaze!
Miaw, miaw kifer to pe tarde?
Miaw, miaw, degaze, degaze!
Miaw, miaw mo kontan to gate!
Miaw, miaw degaze, degaze!
Ler aswar mo pe fer mo bann devwar,
Mo minou, gro malen, rod fer mwa kwar
Mo bizen repoze pou mo dibien;
Lergete mo kone li pe pans lwen.
Miaw, miaw degaze, degaze!
Miaw, miaw kifer to pe tarde?
Miaw, miaw, degaze, degaze!
Miaw, miaw mo kontan to gate!
Miaw, miaw degaze, degaze!
SAT MARON
Devi pa'le manz so roti,
Li dir ki roti finn rasi.
So mama finn perdi pasians
Li dir li kifer to'nn vinn rans
Beti! Beti!
Nana beti, nana beti
Ti beti pa'le nana.
Si beti pa'le nana
Sat maron pou nana twa, beti.
Devi napa'le al dormi,
Li dir so lili santi pi.
So mama finn perdi pasians
Li dir li kifer to'nn vinn rans
Beti! Beti!
Dodo baba, dodo baba
Ti baba pa'le dodo.
Si baba pa'le
Sat maron pou nana twa, beti.
Devi pe zwe ar so poupet,
Li pe bat li lor so latet.
Nana! Ekout mwa mo dir twa
Sinon sat maron nana twa
Beti! Beti!
Dodo baba, dodo baba
Ti baba pa'le dodo.
Si baba pa'le
Sat maron pou nana twa, beti.
LAPLI-SOLEY
Dan bor lamer dan disab sek,
Enn ti garson pe fouy tektek.
Enn vie peser get li riye,
Dir li al fouy disab mouye.
Ti garson la san lev latet
Dir li koumsa kouma li bet.
Lapli-soley dan lesiel ble,
Sirman tektek dan disab sek
Pe sof soley dan ti lapli.
Enn ti tifi pe fer sato
Ar disab fen pre kot dilo.
Enn vie peser get li riye
Dir li tansion lamer monte.
Ti tifi la san lev latet
Dir li koumsa kouma li bet.
Lapli-soley dan lesiel ble,
Sirman sato anba dilo
Pe sof soley dan ti lapli.
Dan bor lamer enn ti zanfan
Pe sey anvol so servolan.
Enn vie peser get li riye,
Peyna divan to pa trouve?
Ti zanfan la san lev latet
Dir li koumsa kouma to bet.
Lapli-soley dan lesiel ble,
Sirman divan mo servolan
Pe sof soley dan ti lapli.
Bann ti zanfan dan bor dilo
Pe zwe maren dan enn bato.
Enn vie peser get zot riye,
Tansion, tansion lamer monte.
Bann zanfan la san lev latet
Dir li koumsa kouma to bet.
Lapli-soley dan lesiel ble,
Sirman dilo anba bato
Pe sof soley dan ti lapli.
Zoli lasirenn enn par enn,
Kot zot pe ale enn par enn?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
2
Zoli payanke de par de,
Kot zot pe ale de par de?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
3
Zoli kakatwa trwa par trwa,
Kot zot pe ale trwa par trwa?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
4
Zoli ti-mourgat kat par kat,
Kot zot pe ale kat par kat?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
5
Zoli pwason zenk senk par senk,
Kot zot pe ale senk par senk?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
6
Zoli ti-golfis sis par sis,
Kot zot pe ale sis par sis?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
7
Zoli ti-sevret set par set,
Kot zot pe ale set par set?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
8
Zoli ti-ourit wit par wit,
Kot zot pe ale wit par wit?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
9
Zoli zoli bef nef par nef,
Kot zot pe ale nef par nef?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
10
Zoli ti-zenis dis par dis,
Kot zot pe ale dis par dis?
Lapli pe tonbe do mama,
Nou pe al kasiet lwen laba.
Atansion zanfan! Atansion!
Napa tom piktet dan raket;
Pou kasiet lapli azordi,
Tengn soley diaman pou toultan.
BONANIVERSER
Bann ti-petal dife kouler
Lor to gato sant lalimier.
Sak labouzi lor to gato
Ekler to laz mo ti-koko.
Nou tou ki la,
Mama, papa,
Granper, granmer,
Tou to fami
Nou sant anker
Bonaniverser,
Bonaniverser,
Bonaniverser,
Bonaniverser.
KAS-KAS NIKOLA
Depi lontan bann flanbwayan
Pe larg zot fler lor nou later.
Ale zanfan nou sant anker:
Nou lespwar gran, nou lespwar gran.
Kas-kas nikola dan ki labarb?
Kas-kas nikola dan ki labarb?
Labarb Bonom Noel kasiet sirpriz.
Anou sante-danse,
Nou tou bann miz.
Lontan-lontan, bien-bien lontan
Enn ti-zanfan ti pran nesans.
Bann gran-sennyer ti rod nway li,
Enn sans, zot rans, zot pa gagn sans.
Kas-kas nikola dan ki labarb?
Kas-kas nikola dan ki labarb?
Labarb Bonom Noel kasiet sirpriz.
Anou sante-danse,
Nou tou bann miz.
Dan so leker ti'ena grander,
Dan so lespri ti'ena pardon.
Pou selebre so lalimier
Nou respe ton, nou dans anron.
Kas-kas nikola dan ki labarb?
Kas-kas nikola dan ki labarb?
Labarb Bonom Noel kasiet sirpriz.
Anou sante-danse,
Nou tou bann miz.
Nou sant anker, nou lespwar gran;
Nou respe tan, nou respe ton.
Fler vermiyon lor flanbwayan
Pe dir zanfan fet Bonom Noel.
Kas-kas nikola dan ki labarb?
Kas-kas nikola dan ki labarb?
Labarb Bonom Noel kasiet sirpriz.
Anou sante-danse,
Nou tou bann miz.
Dan mo zarden ena enn pie,
Enn pie raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
2
Dan mo zarden ena enn pie,
Enn pie raport zanblon.
E lor mo pie ena gro-brans,
Gro-brans raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
3
Dan mo zarden ena enn pie,
Enn pie raport zanblon.
E lor mo pie ena gro-brans,
E lor gro-brans ena ti-brans,
Ti-brans raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
4
Dan mo zarden ena enn pie,
Enn pie raport zanblon.
E lor mo pie ena gro-brans,
E lor gro-brans ena ti-brans,
E lor ti-brans ena gro-grap,
Gro-grap raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
5
Dan mo zarden ena enn pie,
Enn pie raport zanblon.
E lor mo pie ena gro-brans,
E lor gro-brans ena ti-brans,
E lor ti-brans ena gro-grap,
E lor gro-grap ena ti-grap,
Ti-grap raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
6
Dan mo zarden ena enn pie,
Enn pie raport zanblon.
E lor mo pie ena gro-brans,
E lor gro-brans ena ti-brans,
E lor ti-brans ena gro-grap,
E lor gro-grap ena ti-grap,
E lor ti-grap ena bann fler,
Bann fler raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
7
Dan mo zarden ena enn pie,
Enn pie raport zanblon.
E lor mo pie ena gro-brans,
E lor gro-brans ena ti-brans,
E lor ti-brans ena gro-grap,
E lor gro-grap ena ti-grap,
E lor ti-grap ena bann fler,
E dan bann fler ena lagren,
Lagren raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
8
Dan mo zarden ena enn pie,
Enn pie raport zanblon.
E lor mo pie ena gro-brans,
E lor gro-brans ena ti-brans,
E lor ti-brans ena gro-grap,
E lor gro-grap ena ti-grap,
E lor ti-grap ena bann fler,
E dan bann fler ena lagren,
E dan lagren ena zanblon,
Zanblon raport zanblon.
You you mo pie zanblon,
Mo pie zanblon raport zanblon.
You you mo pie zanblon,
Mo pie zanblon raport zanblon.
Kouler rouz flanbwayan pe apel banane,
Enn papiyon oranz dan lalimier dore
Pe kas poz lor fler zonn kot legliz Kaylason,
Pe kas poz lor fler zonn kot legliz Kaylason.
Enn bouke larkarsiel do mama,
Enn bouke larkansiel;
Enn bouke larkarsiel do mama,
Enn bouke larkansiel.
Zis pou twa,
Zis pou twa.
2
Enn seren-dikap zonn lor pie filao ver
Laba dan lesiel ble pe kontanple lamer,
Lamer ki finn marye laba ar ble fonse,
Lamer ki finn marye laba ar ble fonse.
Enn bouke larkarsiel do mama,
Enn bouke larkansiel;
Enn bouke larkarsiel do mama,
Enn bouke larkansiel.
Zis pou twa,
Zis pou twa.
3
Soley finn al dormi dan dilo endigo,
Lesiel finn vinn violet, li finn sanz so palto,
Bann zetwal pe briye, tou zanfan al dodo,
Bann zetwal pe briye, tou zanfan al dodo.
Enn bouke larkarsiel do mama,
Enn bouke larkansiel;
Enn bouke larkarsiel do mama,
Enn bouke larkansiel.
Zis pou twa,
Zis pou twa.
Lisien Meg
Enn lisien meg, mengi-mengi
enn swar reysi rant dan lakaz
enn gran misie plennti-plennti,
pas par latrap sere-sere,
al fer piknik dan gard-manze.
Manze, manze plis ki bizen;
telman manze finn rasazie
me ler finn ler pou li sorti
latrap ser so vant bien gonfle.
Li sey sorti. Abba! Abba!
Enn lisien gra tann li plengne;
verse, gete, lev so nene:
"fer to karem, sarye lakrwa;
ler to megri, to va sorti."
Sap Dan Karay, Tom Dan Dife
Enn zako lor enn pie santi brans pe kase;
li kriye, sipliye, dimann led tou kote.
Pie kanpes anba li dir li pa per piti;
larg lekor mo gob twa, mo poz twa lor lili.
Plon li tom dan pikan ki rey-rey so deryer,
ki desir so laser, fer li kriye maler,
fann so lapo touni ziska li tous later
lor enn nik fourmi rouz ki bwiy ar lakoler.
Avan li ferm lizie, ti zako get leker
pie kanpes plen ar fler ki pe prepar so grif
ar regar satanik. "Ou ti dir mwa zete?"
- "Mo ti dir ou zete pou avoy ou manze.
Mwa mo swiv mo ensten; ou ki bizen pran kont
pa rant drwat dan dife zis pou sap dan karay."
Zes Touy Konesans
Enn servolan imitasion larkansiel
pe met dan zar, fer so fezer dan lesiel.
Enn ti mwano, baba fek konn anvole
koste kot li pou sey konpran so sekre.
Gran matapan kan li zwenn pli feb ki li
fer pli vantar ki lakord ki tini li,
maltret mwano dir li fonn depi isi,
al dan lamar parmi zans ki kouma li.
Pov ti mwano al lakaz ar so lapenn,
parl so mama sagren ki pe pens so nam.
"Ayo baba, pa gete seki paret;
sevolan la li fer kwar ki li enn fwet
me lergete li peyna okenn laflam;
li nek fer senn me lezot tini so renn."
Kan Fatra Rod Vinn Lerwa
Enn ti zako kolorye,sot-sote, sote-pile,
fer koustik enpresionan (enn sef sirk dan tirer plan),
reysi met tou zanimo dan basen so prop siro.
Tou zanimo deside met lakle dan so lame,
donn li renn ek fwet osi pou li diriz zot pei.
Tou zanimo eksite, zis torti ki ser so sang.
Ki li kapav fer aster pou li ouver lizie tang?
Li envit gran-nwar zako dan enn gran karo banann,
dir bann lezot zanimo kasiet vey so sinema.
Ler li kwar ki li tousel zako koumans tamasa:
fer piyaz, fer gaspiyaz ziska ki li gagn jare.
Ler li tann lezot riye li konpran so rol mike.
-"Kifer to met lak ar mwa, met tou mo pese touni?"
- "Pou anpes bann bachara fer fatra vinn zot lerwa."
Get Bien Avan To Sote
Enn renar dan fer vantar enn aswar tom dan trou nwar.
Malgre ki saler tape, dan so trou li pe tranble,
bizen vey soley leve pou kapav gagn enn seke.
Boner ler lizour pwente kabri ek mouton borde
pou bwar laroze fre-fre lor lerb tann dan bor trou nwar.
" Bonzour, bonzour bann kamwad, ala zot bien zoli la
kan get zot depi anba. Vadire zotmem lerwa!"
San mem get divan, deryer toulede sot dan trou nwar.
Kouma pou sorti aster? Konper renar dres papie.
Kabri mont lor mouton gra, renar grenp lor toulede
e ar zis enn ti zefor li travers rebor trou nwar.
"Bay-bay, salam, orevwar! Gete kouma mo zoli!
Vadire momem lerwa! Pran pasians, pa trakase;
mo sir taler enn gopia pou ed zot mont kadadak."
Mask Ek Servo Lan
Konper yev fer enn rev holiboliwoud.
Holiboliwoud do mama, holiboliwoud!
Dan sak fim ki li zwe li met nouvo mask,
mask Zoro, mask zako, mask papie mase;
partou kot li pase dimoun aplodi
e zour ki donn Oskar li gagn premie pri.
Konper yev fer enn rev holiboliwoud.
Holiboliwoud do mama, holiboliwoud!
Mask lor mask, mask lor mask servo fatige;
mask lor mask, mask lor mask so servo vinn lan
ziska ki zour vini so servo kaye,
tou so mask tonbe. Konper yev anpandan.
Ler li mor, lor so tom holiboliwoud
torti ekrir: "Tansion mask papie mase!"
Lisien Meg, Lisien Gra
Enn fwa dan pei lontan
ti'ena enn lerwa restan
ki lepep ti deteste
parski li ti bien move;
li nek konn ranpli so pos,
vinn gra lor lepep so bos.
Enn zour lepep sap lor kal,
desid pou tay so palto,
ronfle zon, donn li sawal,
tras koler lor so ledo.
Aster douk souk zot desten!
Lisien meg ki'nn pran so plas
ena lapeti voras.
Plis li manze, plis li fen.
Rod Fer Bourik Manz Lazle
Enn fwa dan enn ti vilaz anpandan lor enn plato
ant falez ek presipis kot lanatir toulezour
met lak ar lespwar imen, ti ena enn ti fermie
ki ti ole sanz tousa, fer imen ek lanatir
viv ansam dan larmoni e efas net tirayman.
Fermie la dan so laferm ti ena enn vie bourik;
li ti apel li Einstein. Toule gramaten-tanto
fermie la bros so ledan, met siraz lor so sabo,
poz sapo lor so latet, frot parfen lor so likou,
pas pengn fen lor so lekor, met rozet dan so lake.
Me enn zour ler par erer li pe dibout par deryer
bourik la flank enn koutpie. Fermie la voltiz anler.
Enn zwazo ki pe pase dir fermie la, "To trouve?
Ala seki arive kan fer bourik manz lazle."
Mile Ek Daisy
Enn tanto, enn zoli zenis
retourn lakaz, onte, tris-tris;
san manze, li kasiet dan kwen.
Nouvo soley fer li pli per,
per mesanste rey so desten.
Dan lakrwaze bouk mesanste,
antoure ar larme chokra,
kares-kares labarb, atann
Daisy pase pou rod sikann.
Toulezour tortir kontinie.
Tantinn, vwazinn akiz Daisy
rod sikann, marsande, rode.
Me mile, temwen mesanste,
dir bann kabri protez Daisy.
Kan Fouraye Perdi Kara
Enn zoli kakatwa, plim listre, kolorye
enn zour vinn rann vizit so fami elwagne
dan enn bwa ki separ lavil ek lakanpagn.
Mwano, pikpik, boulboul ansam ar zot konpagn;
tourtrel, perdri, korbo, konde ek kardinal
grandi lafoul kirye ki vinn yam bal royal.
Premie zour tou zwazo, so gran kouma piti
pran li kont, okip li, admir so gran lespri,
so bote kolorye, so manier kiltive.
Pa manti nanye, li vremem sivilize!
Deziem zour mem parey me fren pe blok lelan;
trwaziem zour pa koze lagel pran plas ledan.
Lerla zozo mayok dir li pa pran traka.
"Rapel matlo! Kan fouraye perdi kara."
Misie Chouchoundarr
Misie Chouchoundarr, lera-miske gri
dan so ti vilaz Lagliolagli
ti enn gran oustad parski li ti kal
anba ban lekol kan ti'ena rafal.
Depi sa zour la li ti trouv normal
ki li met nene kot pa regard li.
Depi dan so trou li konsey pizon
kouma anvole; montre ziromon
kouma pou file; donn konsey pwason
kouma pou naze; donn leson lisien
kouma lasas yev; eksplik tamaren
kouma met parfim dan bouyon rason.
Enn zour li desid pou edik enn sat
kouma trap lera. Enn sel kout lapat!
Planet Mesanste
Kan Lisifer gagn so tronn dan lanfer
li fer konstrir enn saret grander mons
ki li ranpli ar pese, mesanste
ziska keson deborde ar maler.
Ar so kargo li vizit bann planet
pou kas konte Bondie so kreasion.
Mem li met sold tranzaksion pa marse;
Li traspire, biznes bat lamok net.
Ler pov Lisifer pre pou larg lekor
Belzeboul dir li, " Mo konn enn planet
kot ou marsandiz ena bel valer."
Kouma zot debark lor planet Later
enn niaz nwar bebet ploz drwat lor saret,
konsom kargo prop e dimann ankor.