POEZI 02-03
©Dev Virahsawmy
All rights reserved
| BALAD POU LEMONN MALAD |
| SELEBRE LAMOUR |
| KOSTE PLI PRE |
| DEZAKORDE |
| LESPRI YONIK |
| FETDEMOR |
| KOZA PA ZAZA |
KAISE BELONA 2
Kan berze nepli protez annyo,
e sadou pe fer krim dan berso;
kan lekol napa donn lekleraz
me plonz zanfan dan pit kafouyaz;
kan legliz napa konn gid nou pa
kaise belona do koko, kaise belona?
Kan lerwa Salomon divage
e Rachel so plore res mouye;
kan Noe so rado pran dilo
e Zozef pe desir so palto;
kan Aya finn fini vinn pagla
kaise belona do koko, kaise belona?
Kan progre met kostim roupi-sou,
devlopman dan lesiel pe pers trou;
kan sikse kas pake nikleer
e viktwar pe beni nou maler;
kan pouvwar dan lame bachara
kaise belona do koko, kaise belona?
Kan servi Zezikri pou modi,
souy malang ar sari Dropadi;
kan alim sanbrani ipokrit,
kan partaz parrsadi pou fer kit,
kan sakre finn nwaye dan paysa
kaise belona do koko, kaise belona?
WI ENN GRAN PEI ...
Kot imitasion pas pou kreasion,
fer vadire pran plas obzervasion;
kot touk-touk parsi e kol-kol parla
fer sanblan partou ki samem lafwa
laba mem, baba, mo lonbri ete.
Wi enn gran pei me bien tilespri.
Kot lamare ot manz pie tamaren
e bef, vas, kabri patoz dan basen,
pa zeometrik pe fer lasansion
lor fron Piterbot san transpirasion
laba mem, baba, mo lespwar ti'ete.
Wi enn gran pei me bien tilespri.
Kot mil verb rasi kas ledan lespri,
routinn karyate andormi Shakti,
lalinn san lamson desann so kalson
pou vers so pwazon dan Trou Fanfaron
laba mem, baba, 'enn fwa dan'enn pei'.
Wi enn gran pei me bien tilespri.
Enn fwa dan'enn pei ti'ena Ti Rajou,
Ti'ena Bay Abou ek Tonton Toulsi;
enn fwa dan'enn pei, boukie banane
ti larg petal lor pou anons dime.
Laba mem enn fwa mo ti kwar kikfwa.
Wi enn gran pei me bien tilespri.
ODEK 2
Odek,
lalinn laba pe zigzage, enn gro zetwal pe aval li;
soley pe perdi so petal ki grene kouma vit kraze;
larkansiel ki finn gagn enn fit pe pandi ar lakord enn wit.
Gro zero manz ti zero, samem nou takdir mo bayo.
Bliye to tanbour tanbourye!
Ramas to ravann ravanie!
Lapli finn mouy lapo bouk.
Odek,
Laflam pe griye Makabe e so soufrans pe touf lesiel;
lasid pe ekrir ar lank rouz lor ros lagal Montagn Signo;
lasann pe anvole partou, ranpli poumon ar lamor gri.
Gro zero manz ti zero, nou dal pa pe kwi do matlo.
Bliye to tanbour tanbourye!
Ramas to ravann ravanie!
Lapli finn mouy lapo bouk.
Odek,
Disel finn fini bwar lamer, leponz pe bronze lor disab;
niaz lao gagn lafiev karant, pe rod meksinn dan koray mor;
enn dernie dofen pe kriye, peyna zorey pou ekout li.
Gro zero manz ti zero, dife dan langka mo frero.
Bliye to tanbour tanbourye!
Ramas to ravann ravanie!
Lapli finn mouy lapo bouk.
Odek,
Nou bann zanfan pa rapel yer, zot viv dan zordi permanan
e zot refiz get pli divan - pou zot dime pa ekziste.
Ayo ki erer nou finn fer? Nou finn fer lavi vinn lanfer.
Gro zero manz ti zero, tou finn vinn golmal mo dalon.
Bliye to tanbour tanbourye!
Ramas to ravann ravanie!
Lapli finn mouy lapo bouk.
BEL-BEL BALA
Bel-bel bato do baba, bel-bel bala,
bel-bel bato do baba, finn tas lor resif.
Misie gardien far do baba
dan soulezon
zom bat so fam, viol so tifi,
bliye alim lalanp aswar.
Bel-bel bato do baba, bel-bel bala,
bel-bel bato do baba, finn tas lor resif.
Misie polisie do baba
dan soulezon
so iniform trape, bate.
Kifer respe seki pli feb?
Bel-bel bato do baba, bel-bel bala,
bel-bel bato do baba, finn tas lor resif.
Misie profeser do baba
dan soulezon
lotorite servi savwar
pou pas lame kot pa bizen.
Bel-bel bato do baba, bel-bel bala,
bel-bel bato do baba, finn tas lor resif.
Misie mazistra do baba
dan soulezon
iminite get lazistis
ar de lizie, fer preferans.
Bel-bel bato do baba, bel-bel bala,
bel-bel bato do baba, finn tas lor resif.
Misie misioner do baba
dan soulezon
mision sakre servi konfians
pou fer violans ar ti garson.
Bel-bel bato do baba, bel-bel bala,
bel-bel bato do baba, finn tas lor resif.
Misie geriser do baba
dan soulezon
pouvwar siyans nouri malad,
pa gagn letan okip malad.
Bel-bel bato do baba, bel-bel bala,
bel-bel bato do baba, finn tas lor resif.
Misie repiblik do baba
dan soulezon
parol fer ler konbat ladrog
ek koripsion ar led mafia.
Bel-bel bato do baba, bel-bel bala,
bel-bel bato do baba, finn tas lor resif.
Misie zournalis do baba
ar soulezon
pwisans zimaz ek lekritir
fer titalber vinn Gran Albert.
Bel-bel bato do baba, bel-bel bala,
bel-bel bato do baba, finn tas lor resif.
Misie poetik do baba
ar soulezon
foli-grander pe fer ziedou
ar seki for pou gagn nisa.
Bel-bel bato do baba, bel-bel bala,
bel-bel bato do baba, finn tas lor resif.
Enn sans Mamzel Ners do baba
ar soulezon
lamour pran kont, konsol lapenn,
kalme douler. Sinon tansion
Bel-bel bato do baba, bel-bel bala,
bel-bel bato do baba pou tas lor resif.
FIXDEPOZIT
Misie Lonorab finn fek gagn enn kab
ki lopozision pe rod manz so krab;
zot pe zet labou, pe fann lapipi,
ar nou laservel rod fer satini;
mem bel-bel oustad pe koumans gagn gos
Misie Lonorab panse tousa fos.
Dan so kalbas ena dimiel,
so baraswa ranpli ar viel.
Pa tous kalbas ni baraswa
fixdepozit, fixdepozit.
Enn mahagourou pre kot simitier,
li pa'le tann dir ki roderdeler
pe promet mirak si manz so gajak
ki li'nn prepare pou li may dan lak
bann bon pratikan ki fer bon zanfan
e swiv san tike tou so komannman.
Dan so kalbas ena dimiel,
so baraswa ranpli ar viel.
Pa tous kalbas ni baraswa
fixdepozit, fixdepozit.
Bwana Patriyark zame ti panse
ki kapav enn zour kikenn rod doute
ki enn plis enn pa toultan egal de;
ki lesiel lao depi pli lao
li koumadir enn gran tapi dilo
ki kapav enn zour aval so troupo.
Dan so kalbas ena dimiel,
so baraswa ranpli ar viel.
Pa tous kalbas ni baraswa
fixdepozit, fixdepozit.
Parfwa Romeo, parfwa Ziliet 'si
panse lotla la zame pou reysi
poz regar kasiet, sey louk par lafnet,
rod andeor kad, mem si li fizet,
enn ti emosion, mem li kont sezon,
ki donn movetan so konsolasion.
Dan so kalbas ena dimiel,
so baraswa ranpli ar viel.
Pa tous kalbas ni baraswa
fixdepozit, fixdepozit.
MO TI MATLO
Mo ti matlo,
souy to lizie mo ti koko!
Anou ansam travers aswar,
obliz soley lev so latet
mem nou kone li pou'al kouse.
Ayo matlo,
To papa finn ramas maler,
amenn lakaz donn to mama;
dan so dile to pov mama
san li kone finn les maler
ranz nik amer, touy to boner.
Mo ti matlo,
souy to lizie mo ti koko!
Anou ansam travers aswar,
obliz soley lev so latet
mem nou kone li pou'al kouse.
Ayo matlo,
To granpapa so granpapa
ti bril karo, ti bril danbwa;
ti sem disab dan plantasion,
dan lesiel ble ti kras pwazon.
Aster to mank respirasion.
Mo ti matlo,
souy to lizie mo ti koko!
Anou ansam travers aswar,
obliz soley lev so latet
mem nou kone li pou'al kouse.
Ayo matlo,
to tonton ti enn gran saser
ki ti servi so konesans
pou efas net tou diferans,
kraz lopital ek dispanser.
Aster peyna ners pou swagn twa.
Mo ti matlo,
souy to lizie mo ti koko!
Anou ansam travers aswar,
obliz soley lev so latet
mem nou kone li pou'al kouse.
Ayo matlo,
To lizie dir to pa kone
ki to ete, ki bizen fer,
kot pou ale, kifer to per.
Mo pov matlo, bann gran peto
finn deside to enn zero.
Mo ti matlo,
souy to lizie mo ti koko!
Anou ansam travers aswar,
obliz soley lev so latet
mem nou kone li pou'al kouse.
GLOBALCOM
Mo ti ena enn tipti laboutik
kot mwa, mo madam ek mo bann zanfan
ti travay, ti viv, parfwa al piknik.
Aster laboutik finn vinn enn zean
ki pe aval tou lezot laboutik
e enn nimero pran plas bann kliyan.
Pier-Pol-Zak kot zot ete?
Ki finn ariv lamitie?
Globalcom ki to ete?
Mo ti ena enn tipti karo may
kot mwa ek Basdeo, Zanpier, Bay Sidik
ti pe gagn lavi ar lafors travay.
Aster trakter ek kouper mekanik
anter ti planter dan latrap pitay
ki fer karo may vinn kilometrik.
Pier-Pol-Zak kot zot ete?
Ki finn ariv lamitie?
Globalcom ki to ete?
Mwa mo ti ena enn ti latelie
kot mo ti aranz ek mo ti repar
seki mo vwazen ti pe dimande.
Aster dan lizinn gran kouma vantar
masinn kalkile, masinn dirize,
fors tou mo vwazen viv dan mem aswar.
Pier-Pol-Zak kot zot ete?
Ki finn ariv lamitie?
Globalcom ki to ete?
Mwa mo ti ena mo prop bieneme;
ansam nou ti gagn de zoli zanfan
ki ti resanble de ti zwazo ge.
Me nou ti anvi fer zot vinn zean,
fer zot galoupe avan konn marse ...
ayo! ... zot finn les nou anplan ...
Pier-Pol-Zak kot zot ete?
Ki finn ariv lamitie?
Globalcom ki to ete?
MWA KI MWA
Mwa ki mwa, twa ki twa, nou ki nou, li ki li!
Ler bann imigran sort partou-partou
vinn lor enn ti lil pou sey tras enn kou,
sey fer pie toulsi pous andeor baz,
lor later etranz sey ranz enn lakaz
mo kapav konpran ki dan koumansman
sakenn get lotla ar enn gren mefians
parski pa fasil manej diferans.
Eski li normal apre desan-zan
zanfan, tizanfan imigran lontan
kontinie get so prosen ar degou?
Mwa ki mwa, twa ki twa, nou ki nou, li ki li!
Aster dir mwa, frer, eski li normal
trwasan-zan plitar, katsan-zan mal-mal,
sakenn so sakenn, sakenn so kazot,
aryer tizanfan imigran lontan
pas tou so letan tir lay ar lezot,
nek rod lipou poul, mete mem choula,
rod fer koumadir zot nam li laba
kot lontan-lontan lonbri ti'antere;
la kot zot ete zis enn sel sante
repet-repete zournelman-toultan?
Mwa ki mwa, twa ki twa, nou ki nou, li ki li!
De mil-an pli tar to trouv sa korek,
dir mwa twa aster, pandan ki toulsi
pe fleri partou, lavi aret sek,
roulman aret net, devlopman osi
parski tizanfan imigran lontan
so antikite finn vinn so prezan?
Li pa'le aprann seki pourtan la,
trouv ek tann toulsi sant alelouya,
ouver so lekor, ouver so lespri,
les lapli mouy li, divan beni li.
... Mwa ki mwa, twa ki twa, nou ki nou, li ki li!
Mwa ki mwa, twa ki twa, nou ki nou, li ki li!
Mwa ki mwa, twa ki twa, nou ki nou, li ki li! ...
ZANZAN SAN NOM
Zanzan san nom abandone
sodomize ek maltrete;
Zanzan san nom pa konn plore,
pa konn riye.
Zanfan san nom.
Choup-chap papa napa koz sa!
Sa zistwar la fer perdi pwen
e touris pou lev so nene;
zetwal pou perdi so kara
lakle pou rouye dan kadna.
Zanzan san nom abandone
sodomize ek maltrete;
Zanzan san nom pa konn plore,
pa konn riye.
Zanfan san nom.
Fer koumadir to pa kone!
Pa fane mam, pa ser mo kwen!
Zordi tanto kot prezidan
Pe donn mwa tit Gran Komandan
"Zetwal-Lakle Lasarite".
Zanzan san nom abandone
sodomize ek maltrete;
Zanzan san nom pa konn plore,
pa konn riye.
Zanfan san nom.
Degaze do dir mwa kotsa!
Avoy mesaz lor enternet!
Bann pedofil par tonn desann!
Fini somaz, soudevlopman!
Zanfan san nom! Zanfan san nom!
Zanfan san nom! Zanfan san nom!
Zanfan san nom! Zanfan san nom!
RAMBO MISIONER-SOVER
Lor so ches zetwal larzan,
boxer sort kouler ble-blan
Rambo misioner-sover
partou konbat Lisifer,
fer tou bann aveg trouv kler.
Sevalie san per, san repros,
kot li pase taye, raze;
kan so lizie demi-ferme
pa zis li pe priye Bondie,
li pe vize pou plen nou pos.
Lor so ches zetwal larzan,
boxer sort kouler ble-blan
Rambo misioner-sover
partou konbat Lisifer,
fer tou bann aveg trouv kler.
Nanye pa konplike pou li:
ena Bondie ek Lisifer;
leker ki sal ek bon leker;
li konn parfim so liniver:
bann mars ar li pa santi pi.
Lor so ches zetwal larzan,
boxer sort kouler ble-blan
Rambo misioner-sover
partou konbat Lisifer,
fer tou bann aveg trouv kler.
Li fer voler vinn sakristen,
diktater vinn samariten,
kriminel aplay pou vinn sen,
li fer kreten vinn lorea
ar zis enn ti pogne lafwa.
Lor so ches zetwal larzan,
boxer sort kouler ble-blan
Rambo misioner-sover
partou konbat Lisifer,
fer tou bann aveg trouv kler.
POUL VAKABON, POUL LIBERTE
Lisou, soufler, gro pima ver,
zariko tann, ti pima ver,
margoz, lalo, patol, zwagnon,
poul vakabon samem ki bon.
Poul vakabon, poul liberte.
Poul vakabon, poul liberte.
Globalisons, globalisez
global, global partou donn bal.
Ouver laport, lafnet, lenpos
les Dolar globaliz to pos;
mont lor lili, tengn lalimier
les meriken bwar to labier;
aprann to nouvo rol par ker,
sirtou pa sant vie sante yer.
Lisou, soufler, gro pima ver,
zariko tann, ti pima ver,
margoz, lalo, patol, zwagnon,
poul vakabon samem ki bon.
Poul vakabon, poul liberte.
Poul vakabon, poul liberte.
Marse mondial mondialize,
marse global globalize.
Nou tou egal divan marse
mondialize, globalize.
Bliye to vie tonel sousou,
mo dir twa li pa vo enn sou;
aprann to nouvo rol par ker,
sirtou pa sant vie sante yer.
Lisou, soufler, gro pima ver,
zariko tann, ti pima ver,
margoz, lalo, patol, zwagnon,
poul vakabon samem ki bon.
Poul vakabon, poul liberte.
Poul vakabon, poul liberte.
Pa kwar mo lespri aryere!
Mo kontan rok ek jaz osi,
Mo gourou li Noam Chomsky.
Olie nou tou viv mem parey
mo prefer net diversite,
pa'le dime kouma lavey.
Mo pa pou aprann rol par ker,
me mo pou sant vie sante yer.
Lisou, soufler, gro pima ver,
zariko tann, ti pima ver,
margoz, lalo, patol, zwagnon,
poul vakabon samem ki bon.
Poul vakabon, poul liberte.
Poul vakabon, poul liberte.
GRAN KALIPA
Ale, ale,
tou dimoun lor lalinn depar!
bebe, adilt, zenes, vieyes,
atlet, malad, andikape
tou dimoun lor lalinn depar!
Ale, ale!
Gran Kalipa, limem sef sirk,
limem profet egalite
e dan so liv ena enn mo,
enn sel mo kle, pa badine,
enn mo senk let, zoli koze:
P, R, O, F, I.
Koupe, transe, taye, raze;
kraze, trangle, touye, ronfle
me pa bliye labib senk let:
P, R, O, F, I.
Ale, ale,
tou dimoun lor lalinn depar!
bebe, adilt, zenes, vieyes,
atlet, malad, andikape
tou dimoun lor lalinn depar!
Ale, ale!
Lontan ti'ena diversite
e nou manze ti organik.
Aster manze ki modifie
pe kas leren bann pov fermie
ki pa pe swiv nouvo lozik
P, R, O, F, I.
Gran Kalipa kontrol semans,
kontrol marse, kontrol krwasans,
sem lafaminn pou garanti
P, R, O, F, I.
Ale, ale,
tou dimoun lor lalinn depar!
bebe, adilt, zenes, vieyes,
atlet, malad, andikape
tou dimoun lor lalinn depar!
Ale, ale!
Later malad pa pe kapav
reponn lapel; zanfan gagn fen,
Rachel plore; enn pov fermie
finn swiside; det pe tap pil;
pa enportan pourvi ena
P, R, O, F, I.
Gran Kalipa, pov bachara
pa trouv pli lwen ki so nene;
lor so linet li finn ekrir
P, R, O, F, I.
Ale, ale,
tou dimoun lor lalinn depar!
bebe, adilt, zenes, vieyes,
atlet, malad, andikape
tou dimoun lor lalinn depar!
Ale, ale!
DE TIBOUT DIBWA
Lontan mo ti'ena de tibout dibwa,
enn kacha-kacha, detrwa parol rar
e ler ti met zot dan kof lagitar
enn ti lagam dou ti dans nou sega.
Kifer mo ti rod palto dideor?
Lontan mo ti'ena lamok delivre,
sapsiway zoli, gouli ek dannta,
patang, rwadezer, korl tou kalite
ki ti met lanbias dan mo gawn laba.
Kifer mo ti rod palto dideor?
Lontan mo ti'ena dalpita, lasi,
chapati, baja ek karribarri,
kichiri, zasar ek rougay bomli
ki ti plen nou vant e fer nou grandi.
Kifer mo ti rod palto dideor?
Lontan mo ti'ena palto larkansiel,
maja karousel, gato ar dimiel,
lamarel Sinwa, fet dan sitadel
ki ti plen nou nam ar lazwa reel.
Kifer mo ti rod palto dideor?
Kifer mo ti rod palto dideor?
Kifer mo ti rod palto dideor?
SERIF KOSMIK, GABLOU LINIVER
Gablou liniver tir so revolver;
laterer krake, rant anba later.
Gran serif kosmik fer enn gran koustik,
tir so bazouka pou touy enn moustik
me malsans pou li, moustik malarya
dan so marekaz pa per bazouka.
Gran serif kosmik, gablou liniver
yer ti dan banke ar satan zordi
parski ti bizen mat ar lisifer.
Me lisifer yer so matlo zordi
e dime kikfwa, mo pli sir sirman,
satan, lisifer ek lezot lerni
ar serif zordi pou rod lamerdman.
Gablou liniver tir so revolver;
laterer krake, rant anba later.
Gran serif kosmik fer enn gran koustik,
tir so bazouka pou touy enn moustik
me malsans pou li, moustik malarya
dan so marekaz pa per bazouka.
Enn swar kontsezon madam gran serif
koz dan so zorey - zorey misie la -
dir li dan enn rev - li pa rapel sif -
enn lavwa ti dir - pa enn movezer -
ki bann malfeter, bann pov bachara,
nouri zot laenn ar pianter lamar
- laplipar li kwar. Lamar ki fotif.
Gablou liniver tir so revolver;
laterer krake, rant anba later.
Gran serif kosmik fer enn gran koustik,
tir so bazouka pou touy enn moustik
me malsans pou li, moustik malarya
dan so marekaz pa per bazouka.
Gran serif kosmik sey fer enn zefor.
So ti fron plise, so lizie ferme
- kouma kan dimoun gagn konstipasion -
pou li sey konpran mesaz profetik.
Gran mersi Bondie, li gagn so lozik:
Si se marekaz ki nouri moustik,
nou touy tou moustik pou touy marekaz.
Gablou liniver tir so revolver;
laterer krake, rant anba later.
Gran serif kosmik fer enn gran koustik,
tir so bazouka pou touy enn moustik
me malsans pou li, moustik malarya
dan so marekaz pa per bazouka.
LI POU, LI POU ...
Dan mo vilaz lor enn gran niaz
nou ena enn gran mazisien
ki toulezour ar mem bataz
li fer tanto vinn gramaten.
Nou anpandan lor so lalev,
bwar so parol meksinn lafiev
mem nou soufer ipotermi.
Ayaya!
Nou lespri finn vinn satini.
Li dir nou li pou, li pou, li pou;
li dir nou koumsa bizen pasians;
bizen sakrifis, tou pou korek
nek fer li konfians.
Li dir nou li pou, li pou, li pou,
li pou fer mirak.
Li dir bizen ser nou sentir.
Nou finn sere ziska bann trou
koste ar bouk, depas mizir,
rod aval bouk, rod aval tou.
Nou anpandan lor so lalev,
bwar so parol meksinn lafiev
mem nou soufer ipotermi.
Ayaya!
Nou lespri finn vinn satini.
Li dir nou li pou, li pou, li pou;
li dir nou koumsa bizen pasians;
bizen sakrifis, tou pou korek
nek fer li konfians.
Li dir nou li pou, li pou, li pou,
li pou fer mirak.
Enn fwa mo tonton ti dir mwa
fer atansion bann mazisien;
zot pas letan riy zot prosen,
apre zot zwe mem sinema.
Nou anpandan lor so lalev,
bwar so parol meksinn lafiev
mem nou soufer ipotermi.
Ayaya!
Nou lespri finn vinn satini.
Li dir nou li pou, li pou, li pou;
li dir nou koumsa bizen pasians;
bizen sakrifis, tou pou korek
nek fer li konfians.
Li dir nou li pou, li pou, li pou,
li pou fer mirak.
LABOU FINN BROUYE
Labou finn brouye, atann li poze.
Lerla pou trouv kler.
Boukou violans dan lakaz
gat menaz ek kraz lape;
pouvwar labraget regne
san partaz ek san lamour;
fam li nek enn bwat maja,
zanfan pey lepokase.
Eski nou Bondie Lamour
Pou nanye mor lor lakrwa?
Labou finn brouye, atann li poze.
Lerla pou trouv kler.
Dan biro ek dan karo
kot gete mem sinema.
Labraget ek bayonet
marye pike dan violans
martiriz seki kontrer,
rod vanzans, touy inosans.
Eski nou Bondie Lamour
Pou nanye mor lor lakrwa?
Labou finn brouye, atann li poze.
Lerla pou trouv kler.
Dan vilaz kouma lavil
seki for kraz kor bann feb;
fam, zanfan tas dan take
partou kot nou pe gete.
Partou lor tou kontinan
mem larm pe trangle zanfan.
Eski nou Bondie Lamour
Pou nanye mor lor lakrwa?
Labou finn brouye, atann li poze.
Lerla pou trouv kler.
DALON-DOUSHMANN-DALON
Yer li ti doushmann, zordi li dalon;
yer li ti dalon, zordi li doushmann.
Donn mwa to dibien ek tou to later
si to pa'le mo anter twa, mo frer.
Pou enn pogne dolar nwar anlikid
prezidan dan mo baitka pa timid
avoy larme gro lebra kas zepol
bann seki pa'le konpran ki zot rol.
Yer li ti doushmann, zordi li dalon;
yer li ti dalon, zordi li doushmann.
Donn mwa to dibien ek tou to later
si to pa'le mo anter twa, mo frer.
Li fer signdekrwa kot lagrot Marie
avan so solda viol tou bann zennfi,
bann madam marye ek bann vie osi
pou tengn so laswaf vanzans ek roupi.
Yer li ti doushmann, zordi li dalon;
yer li ti dalon, zordi li doushmann.
Donn mwa to dibien ek tou to later
si to pa'le mo anter twa, mo frer.
Senk fwa toulezour li get ver Mecca
pou resit parker lapriyer Allah
me zame li pans ki tifi Bondie
gagn drwa viv lavi san pas dan dife.
Yer li ti doushmann, zordi li dalon;
yer li ti dalon, zordi li doushmann.
Donn mwa to dibien ek tou to later
si to pa'le mo anter twa, mo frer.
Zot finn konfiske lakrwa Zezikri
e dan so plas zot finn met trwa fizi;
finn pers bal diri ar zot bayonet
e dan kalis-dor zot gard sigaret.
Yer li ti doushmann, zordi li dalon;
yer li ti dalon, zordi li doushmann.
Donn mwa to dibien ek tou to later
si to pa'le mo anter twa, mo frer.
Lingam get yoni ar enn regar frwa
ki touy santiman, trangle tibaba,
fer organn lazwa vinn zouti tortir.
Ayo zot pe fer Dropadi martir!
Yer li ti doushmann, zordi li dalon;
yer li ti dalon, zordi li doushmann.
Donn mwa to dibien ek tou to later
si to pa'le mo anter twa, mo frer.
KADO BONDIE
Satan finn koken pli zoli kado Bondie;
ar lame ketren li'nn souk nou nam imortel.
Oh zame, zame fer lamour ti enn pese!
Fer malis ki enn pese, enn pese mortel.
Dan dezir ek plezir partaze,
dan done san rod jos egois
ena enn etensel kreasion
ki pran so nouritir dan Big Beng.
Me malsans, oh malsans, gran malsans:
satan finn koken pli zoli kado Bondie;
ar lame ketren li'nn souk nou nam imortel.
Oh zame, zame fer lamour ti enn pese!
Fer malis ki enn pese, enn pese mortel.
Dan lamour Adam ek so Evlinn;
dan lamour Adan ek so Lolo;
dan lamour Evlinn ek so Mislinn
peyna okenn pese do matlo.
Me malsans, oh malsans, gran malsans:
satan finn koken pli zoli kado Bondie;
ar lame ketren li'nn souk nou nam imortel.
Oh zame, zame fer lamour ti enn pese!
Fer malis ki enn pese, enn pese mortel.
Lamour lib zame ti enn pese.
Bann sournwa, ipokrit, mousana
ki fabrik mask ar zimaz Bondie
ti bizen kasiet zot tralala
e malsans, oh malsans, gran malsans:
satan finn koken pli zoli kado Bondie;
ar lame ketren li'nn souk nou nam imortel.
Oh zame, zame fer lamour ti enn pese!
Fer malis ki enn pese, enn pese mortel.
GRAVIE DAN MO SOULIE
Enn gravie rant dan mo soulie,
marse pa pe kapav marse;
dilo pe rant dan mo sapo,
mo lespri pe koul dan dalo.
Kan mo ti zenn mo ti kriye;
kriye for pou lesiel tande:
"Rann mwa mo Diego! Degaze;
rann mwa mo Diego!"
Zordi mo'nn konpran do matlo,
zordi mo'nn konpran:
"Gard Diego, me donn enn pitay!
Si to'le plis, donn twa Moris.
Mo donn twa tou, nek donn pitay!
Mo donn twa tou, nek donn pitay!
Mo donn twa tou, nek donn pitay!"
Enn gravie rant dan mo soulie,
marse pa pe kapav marse;
dilo pe rant dan mo sapo,
mo lespri pe koul dan dalo.
Lontan-lontan, ler mo ti zenn
- pa kwar mo ti pe fer enn senn -
mo ti kritik katorz fami
ti pe fer mari,
ti pe fer mari do matlo
ar mo bann dalon.
Aster mo konpran do matlo!
Bizen al dodo ar Dodo.
Les mo dodo ar mo Dodo!
Les mo dodo ar mo Dodo!
Les mo dodo ar mo Dodo!
Enn gravie rant dan mo soulie,
marse pa pe kapav marse;
dilo pe rant dan mo sapo,
mo lespri pe koul dan dalo.
Ena mil-an kan mo ti zenn
- pa kwar mo ti pe kas enn yenn -
mo dir bann zenn koz natirel,
aret koz barok.
Aret koz nenport do matlo,
aret koz barok.
Aster mo konpran, bizen koz
Esperannto ek Volapouk,
Esperannto ek Volapouk,
Esperannto ek Volapouk
Esperannto ek Volapouk .....
(Zwiye 2002)
Ti-Rajou 2
mo Ti-Rajou
plis ki ventan to pe rode
mo ti-Rajou
enn sime ki pa bril lipie
asfalt pe fonn
telman soley pe kras dife
retourn lakaz
ayo beta retourn lakaz
mama pa la
me li finn kit enn ti mesaz
mo Ti-Rajou
pa kwar to tousel dan traka
get bien laba
sourir timid pe rod lavwa
enn regar kler
pe apel twa dan so lebra
bliye larm yer
ayo beta ena dime
mo pa pou la
me mo kone to pou ere
mo Ti-Rajou
sak sezon ena so bote
retourn lakaz
ayo beta retourn lakaz
retourn lakaz
san twa tristes nway nou vilaz
retourn lakaz
gomon pe pous lor nou pavaz
retoun lakaz
retourn lakaz mo Ti-Rajou
Dan Tavern
eh matlo anou lev nou ver
bwar lasante lamitie ek lamour
eh gate anou lev nou ver
pou selebre fler tou kouler
si enn zour lamitie ek lamour
tengn dan bobes lalanp nou lakour
samem zour mo pou bes mo popier
samem zour mo pou bes mo popier
eh matlo anou lev nou ver
bwar lasante nou frer, nou ser
eh gate anou lev nou ver
pou selebre lamour ek lamitie
si enn zour violans ek laenn
tengn nou diya, plonz tou dan nwar
samem zour mo pou bes mo popier
samem zour mo pou bes mo popier
eh matlo anou lev nou ver
bwar lasante zwazo tou kouler
eh gate anou lev nou ver
pou selebre lespwar ek boner
si enn zour tilespri ek mesanste
nway lalimier, plonz tou dan trou
samem zour mo pou bes mo popier
samem zour mo pou bes mo popier
eh matlo anou lev nou ver
bwar lasante Dife-Kreater
eh gate anou lev nou ver
pou selebre Nesans-Renesans
si enn zour lendiferans
efas sourir lor figir zanfan
samem zour mo pou bes mo popier
samem zour mo pou bes mo popier
Mwa mo ti konn sa!
Baba dan to ti ber to pa pou konn sa.
Kan mwa mo ti baba anba pie tamaren,
badamie, zavoka, mang, zanblon, katrepis
bann zanfan ti pe zwe, get loyo ek lagren
zet bourzon, ouver leker dan later fertil
nouri par pie ki nouri pie. Mwa mo ti konn sa.
Twa baba to pa pou konn sa.
Kan mwa mo ti zanfan dan bor dilo
nou ti ramas bred, sevret ek kamaron;
zanbos, zanbourzwa ti plen nou labous ar douser;
nou ti konn naze avan konn marse;
dilo ti kler, nou ti ere. Mwa mo ti konn sa.
Twa baba to pa pou konn sa.
Kan mwa mo ti zanfan nou ti plen nou poumon
ar ler fre; lopresion, alerzi ti bien rar;
nou ti zwe dan soley san traka ziska tar;
pa ti'ena okenn trou dan lesiel, ni pwazon;
sezon ti swiv kalandriye. Mwa mo ti konn sa.
Twa baba to pa pou konn sa.
Olie prezerv to lavenir
mo finn detrir to liniver.
Pardonn mwa baba. Pardon!
Mo finn fane,
to pou peye. Pardon!
Baba dan to ti ber to pa pou konn sa.
Ti-Mimi
Ti-Mimi,
avan mo ne mo mama dir
Ti-Frer ti fer twa lav ver la;
lav ver la, met zafer la;
met zafer la dan sa ver la.
Lane ale, lane vini
Ti-Mimi li fer mem zafer.
Ti-Mimi,
avan mo ne mo mama dir
to ti aroz so pie douri,
lav so lipie, met sanbrani,
aksepte limem to swami.
Liver ale, lete vini
Ti-Mimi li fer mem zafer.
Ti-Mimi,
avan mo ne mo mama dir
to met bizou ek maskara,
to prepar zepis masala
pou ranz kari sa ti boug la.
Later tourne, soley vire
Ti-Mimi li fer mem zafer.
Ti-Mimi,
less zot koze tank zot anvi,
less zot zaze ziska zot rans,
mwa mo kone mo kontan twa,
mo bizen twa. Samem mo sans!
Lane ale, lane vini
mo Ti-Mimi sof mo leker.
Zanfan lor lakrwa
Nipat, malnouri, Uche, Moy, Rajni
Lafrik, Lenn, Lasinn pa pe fouy poubel
pe sarye poubel, pe netway latrinn
lwen-lwen-lwen bien lwen lakaz so mama
dan enn lot pei, kot enn lot fami
ki pa so pei, ki pa so fami.
Par milie toulezour Zezi zanfan
lor lakrwa pe pey pese zot paran.
Uche, Moy, Rajni, zot lenz kas-kase,
- koulwar kourander - pou enn bout dipen,
enn ti gouni so dan enn ti kwen sek
fer louvraz, komision, netway lakaz
parski enn swar kan bann gran pe dormi
kamion zanfan ti netway zot vilaz.
Par milie toulezour Zezi zanfan
lor lakrwa pe pey pese zot paran.
Pa kwar zistwar yer mo pe rakonte
me zistwar zordi dan boukou pei
kot zanfan pei Lenn, Lafrik, Lasinn
sak zour par milie - pitay sanz lame -
vinn lartik ki dormi dan lekiri,
ki zame pou konn lavi anfantinn.
Par milie toulezour Zezi zanfan
lor lakrwa pe pey pese zot paran.
Tigabi
Lor televizion
bourzwa la koz revolision
enformatik, sibernetik
elektronik, katastrofik
enn kompyouter pou sak lakaz
enn lakaz pou sak dimoun
enn dimoun pou sak milie
Tigabi pa okouran
c.e.b finn koup kouran
Lor televizion
bourzwa la koz revolision
pedagozik, boutey plastik
kosmolozik, panse inik
si pa konn lir, pa konn ekrir
pa konn konte pa fer nanye
masinn konn tou, peyna problem
Tigabi fer lekouyon
Li pa'nkor konn fit kreyon
Lor televizion
bourzwa la koz revolision
enerzetik, golmalifik
tiklaketikdemagozik
nepli bizen sof ban lekol
tourn paz dan liv, atrap kreyon
masinn fer tou. Nek pez bouton!
Tigabi merit enn klak
li pa'le konpran mirak.
Destin sa?
Si mo dir twa ki mem avan
ki mo zwenn twa, mo lizie ti,
dan gran lafoul rod to regar,
to pou riye, to pou panse
kan laz rantre bann zom zot vinn
enpe tok-tok.
Si mo dir twa ki mem avan
ki mo zwenn twa, mo de zorey
ti deza konn son to lavwa,
to pou panse kan laz rantre
bann zom zot vinn enpe tok-tok,
enpe pagla.
Mo pa kone si desten sa,
si dan mo memwar koumansman
ena fragman mo prop kontrer
me seki mwa mo sir aster
mo ti deza trouv to sourir
mem avan ki nou de ti zwenn.
Si mo dir twa ki mem avan
ki mo zwenn twa mo narinn ti
konn to parfen, mo labous ti
swaf to labous, pa sikann mwa.
Mo bien kone kan mo pans twa
mo vinn tok-tok.
Mo pa kone si desten sa,
si dan mo memwar koumansman
ena fragman mo prop kontrer
me seki mwa mo sir aster
mo ti deza trouv to sourir
mem avan ki nou de ti zwenn.
Likle Blak Boy
mo tata ti dir mwa likle blak boy
enn swar dan nwar kamion ti ramas twa
twa ek enn ta baba
dan nwar to papa ti koz ar sofer
to mama ti prefer get lot zafer
likle boy i lov you
likle boy i lov you
mo tata ti dir mwa likle blak boy
ti met zot anvrak dan lakal bato
ansam ar zanimo
amenn zot lwen lwen dan enn lot pei
dan enn lot lakaz kot enn lot fami
likle boy i lov you
likle boy i lov you
mo tata ti dir mwa likle blak boy
to ti netway lakaz balye lakour
sarye gamel lour
bros pavaz amenn kabri patiraz
fer louvraz pli gran pli lour ki to laz
likle boy i lov you
likle boy i lov you
mo tata ti dir mwa likle blak boy
kouma Sifon Marmit twa'si enn zour
to pou zwenn Ti Zezi
ki pou donn twa boukou-boukou lamour
afen ki twa'si to swiv so lespri
likle boy i lov you
likle boy i lov you
Saro
Kan Saro ti ne so chachi ti dir
Chi-chi-chi-chi-chi ankor enn tifi
Get kouma li nwar, zanblon pa manti
Sa li pou langri, kikfwa mem pagli
Kan Saro grandi tou dimoun riy li
Komik li marse, komik li koze
Kanar patouyar kikfwa li goungi.
Kisannla enn zour pou marye ar li?
Amwen enn malen ki rod servant fri!
Li pa ti gagn drwa al sof ban lekol
Medekol ti dir peyna plas pou fol
Ni met enn lenz nef pou al dan maryaz
Abiy li zoli? Mari gaspiyaz!
So mama-papa onte aksepte
Ki zot zanfan sa. Enn malediksion!
Nek get lot kote! Fer sanblan pa vre!
Kisannla enn zour pou marye ar li?
Amwen enn malen ki rod servant fri!
Me ti'ena Sarann ki ti diferan
Li'si so paran ti les li anplan
Parski dapre zot li'si ti pagla
Bayra ek gounga, langra ek kannwa
Saro ek Sarann enn zour zot ti zwenn
Kot enn kalimay. San fer okenn senn
Toulede ti sir zot'le viv ansam
Kisannla enn zour ti pou kapav kwar
Ki Saro-Sarann pou zwenn lamour fri?
De Res De Dan Enn
Rani ti kontan Majnou
Raja ti kontan Leila
Mem zot pa ti mem jati
Kouma Ganga-Yamouna
Zot dilo ti melanze
Me kone ki zot ete
De vinn enn me res de dan enn
Do baba, de res de dan enn.
Abelard ti kontan Sita
Heloise ti kontan Rama
Mem zot pa ti mem jati
Kouma Mecca-Medina
Zot listwar ti melanze
Me kone ki zot ete
De vinn enn me res de dan enn
Do baba, de res de dan enn.
Adam ti kontan Steve
Steve ti prefer Ev-Iv
Virzini rod Romeo
Ziliet prefer Virzini
Mem zot pa ti mem jati
Kouma Shrinagar-Jammu
Bethlehem-Jerusalem
Zot listwar ti melanze
Me kone ki zot ete
Pa perdi idantite
De vinn enn me res de dan enn
Do baba, de res de dan enn.
Dan lavi partaze
Dan lavi partaze souvan
Fragman melodi lontan
Parfwa enn fraz, parfwa enn mo
Ouver baraz, larg dilo
Lerla emosion dan fon
Nou memwar exploz ar frison
Fer lepase anbras prezan
Rapel gate, rapel koko?
Dan lavi partaze souvan
Fragman enn bizbiz avan
Kas somey, chombo lagorz
Kouma tanay dan laforz
Lerla transpirasion frwad
Fer labous amer ek fad
Ar regre ki pens prezan
Ayo gate, ayo koko!
Dan lavi partaze parfwa
Fragman enn soupson ding-dong
Vadire bilenbi long
Fer ledan grense, baba
Lerla kouma enn fouka
Nou detrir Desdemona
Met Zezikri lor lakrwa
Nway dime dan regre yer
Plonz Lesperans dan lanfer
Kifer gate, kifer koko?
Lamour Katalog
Telman li get lekran so lizie fer rozet.
Kouma li gagn letan li rod enn video
Zenn akter, zenn aktris sant-sante, dans-danse
E ler zot anbrase Deviani gagn frison.
Deviani kontan get sinema,
So lamour katalog.
Ar fim Hollywood e Bollywood 'si
Ar romanfoto e katalog 'si
Deviani fabrik so prop prens sarman
Gran, for, zoli, brav ek entelizan.
Aswar ler li dormi akter dormi kot li,
Dan bis li al travay akter asiz kot li,
Dan lizinn get dan vid li li trouv enn sourir
Pe kares so lizie, pe vinn bwar so soupir.
Deviani kontan get sinema,
So lamour katalog.
Ar fim Hollywood e Bollywood 'si
Ar romanfoto e katalog 'si
Deviani fabrik so prop prens sarman
Gran, for, zoli, brav ek entelizan.
Li pa kapav soufer prezans frer ek papa
Ni regar pitasie so vwazen mesanste
Ki zame respekte so lekor, so prive
Depi ki li'nn perdi proteksion so mama.
Akoz sa touletan Deviani
Al kasiet dan fiksion
Dan fim Hollywood e Bollywood 'si
Ar romanfoto e katalog 'si
Deviani fabrik so prop prens sarman
Gran, for, zoli, brav ek entelizan.
Balance-sheet Lamour
Aret to grimas do kamwad
Aret to grimas
Dan kaye lamour mo matlo
Peyna de kolonn
Kolonn done ek kolonn pran
Al dimann Ziliet mo fami
Ki vedir lamour
Lamour ki grandi ar done
Lamour pa fer kont
Ki pa koz mo, mwa ek momem
Dimann Tonton Blake mo dalon
So ti nom William
Kifer annyo blan mo koko
Fer tig vinn mouton
Pa fer lamour pas dan konter
Aret to grimas do kamwad
Aret to grimas
Dan kaye lamour mo matlo
Peyna de kolonn
Kolonn done ek kolonn pran
Pa nek koz mo, mwa ek momem
Pa fer lamour pas dan konter
Pa rod met dofen lor lakrwa
Balad San Patri
Pa dir mwa sant enn sante fos
Repet mo ki zis lor lalev
Fraz ipokrit aprann par ker
Ler ek parol artifisiel
Pa dir mwa sant sante forse
Pa dir mwa fier enn bout latwal
Kouler ki santi ipokrit
Ki fabrike san emosion
Ki flote akoz ki'afer
Pa dir mwa pans panse forse
Pa dir mwa lwayal ar enn mo
Ousa reper zeografik
Kot nenport ki bebet feros
Lib pou fer annyo pas mizer
Pa dir mwa koz koze nenport
Pa dir mwa priye enn bout ros
Swiv to sistem lizie ferme
Gob bann lalwa letan margoz
Ki ferm mo nam dan enn prizon
Pa dir mwa sant sante forse
Mwa mo pou sant vilaz-lakaz
Aring-bouring dan lakrwaze
Lamour onet, lamitie vre
E finalman Gran Lalimier
Pa dir mwa sant sante forse
Li bizin Nou Kouma Nou Bizin Li
Emosion-Lentelizans Siprem
Dan sant so explozion-kreasion
Ti met lentelizans-emosion
Pou ki twa ek mwa, mo lamour,
Plizier miliar lane plitar
Kapav mizir lespas-letan
E dekouver nou Kreater,
Koumansman san koumansman.
Li bizen nou kouma nou bizen Li.
Neandertal ti kwar nou tann dir
Ki apre lamor ena lavi
Sapiens-sapiens parey nou tann dir
Akoz sa nou de, mo lamour,
Plizier milie lane apre
Kapav mizir lespas-letan
E dekouver nou Kreater,
Koumansman san koumansman.
Li bizen nou kouma nou bizen Li.
To kwar zis isi otour Soley
Ena santiman entelizan
Ki selebre grander So Lamour?
Pa kwar zis nou de, mo lamour,
Dan imansite liniver
Kapav mizir lespas-letan
E dekouver nou Kreater,
Koumansman san koumansman.
Li bizen nou kouma nou bizen Li.
©Dev Virahsawmy
All rights reserved
Kan peyna nanye reste pou prouve
Finn ler pou dir mersi Bondie.
OM
Finn ler pou dir mersi Bondie.
OM