Tanzantan ena enn revolt kont de lekzame (SC ek HSC) ki MES organize ankolaborasion ar CIE (Departman Lekzame Enternasional Liniversite Cambridge). Ki desizion Repiblik Moris pou pran, mo pa kone me mo kwar ki bann paran, bann profeser ek bann zelev bizen okouran detrwa pies lenformasion pou ki zot gagn enn bon lizour.
HSC li pa enn kour ki prepar bann zenn pou lemonn travay. So mision se prepar e teste bann zenn pou letid iniversiter/ tersier/ profesionel. Anmemtan li permet Repiblik Moris idantifie so bann meyer eleman alafen letid segonder e sa permet leta Morisien ek bann 'pei ami' donn bann labours bann ki pli 'merite' selon kriter performans dan lekzame.
HSC li, dapre mwa, meyer ki Highers Ekose, 'A' level Angle, Internasional Baccalaureate (IB), Matriculation Sid-Afriken ou Baccalauréat Franse. Li ouver laport tou bann gran liniversite dan lemonn.
Depi enntan ena enn kouran lopinion ki pe favoriz IB. Mem Minis Ledikasion finn pran pozision anfaver sa lekzame la. Selman bizen rapel ki IB ena de sistem evaliasion konplemanter: 1. evaliasion par travay ki fer dan klas ek devwar ki fer lakaz (40%) ek 2. lekzame final (60%).
Plizier lotorite dan domenn ledikasion panse ki evaliasion permanan (continuous assessment) li pa donn enn lide kler kapasite enn zelev parski li kapav gagn led paran, profeser prive e enternet (kopie/kole). Eski tou dimoun pou dakor ki servi rezilta IB pou donn bann labours? Eski nou kapav fer 100% konfians bann pwen ki profeser pou donn zelev dan so klas?
Finn ena problem e pou ena ankor problem. Me eski nou pe reazir dan kalm ek lisidite, ousa nou pe amalgam bann problem e les pasion dominn nou lespri?
Pa bes latet fonse! Tansion sap dan karay, tom dan dife!
20.11.08
NOUVO 2008 KONTENI ZENERAL LAKAZ LAO