APRE LAMOR, LATIZANN!
Kristel, lao laba to pe trap to vant riye ler to get bann komik lor later Moris fer zot pinokio. To kone, isi dan paradi manti-manti (dimann Mark Twain, li pou dir twa plis), premie komannman nou relizion KASPAKE, PA MANTI se "PA MWA SA, LI SA" ki, dapre mo bon kamarad Zerar S., nou finn aprann dan Ansien Testaman ar nou papa ek mama dan Zarden Dedenn.
Mo pa bizen dir twa, finn ena gran debordman. To konn sa plis ki mwa. Prezidan Repiblik (PR) dir nou finn ena enn fopa parski ti bizen ferm tou lekol. Merkredi gramaten ler lapli ti pe tonbe eski PR ti dir so Premie Minis (PM) ki ti'a bon ferm lekol pou to sekirite, Kristel? Ti kapav anpes enn fopa!
PM, li, li ena enn larme konseye - mo vwazen kontan dir "konte fini, konseye reste". Personn pa ti dir li ki ena deynnjer deor? Eski li ti dir so apot, Minis Ledikasion Nivo Planeter (MLNP), ki ena danze dimoun vinn pwason?
MLNP li, li ena enn larme konseye ek direkter preprimer, primer, segonder, lokal, rezional, nasional, ... mem enternasional. Personn pa ti dir li:
"Lapli la tonbe do patron;
Lapli la tonbe! Lapli la tonbe,
Dilo rant dan mo wiski."
Aster personn pa pou dir li ki ti'a bon li retir li kom minis ziska ki 'Fact Finding Committee' soumet so konklizion? Li ti'a kapav donn enn bon lekzanp 'NIVO PLANETER'.
Lider Lopozision skandalize par enkonpetans MLNP. Sirma Merkredi gramaten kouma li ti get par lafnet so vila dan River Walk, li ti fini kone ki pou ena bel garrbarr, boukou-boukou douk dan douniya. Eski li ti telefonn so vwazen PM pou dir li bien bizen ferm tou lekol parski 'water, water everywhere'? Mo kopran ki li pa ti pou telefonn MLNP ki enn 'rebis' (rubbish). Me so vwazen PM 'si non! Mo pa konpran.
Eski bann metresdekol, metdekol, rektris, rekter, prensipal ti enform zot siperyer ki ti ena enn sitiasion danzere? Eski bann paran pa ti kone ki gro lapli ti pe tonbe?
Ki mo pou dir twa Kristel, mo Christ-Elle? Kikfwa tomem premie viktim global warming dan Moris! Dilo finn bizen sarye twa pou ki isi dan PARADI MANTI-MANTI, lizie tang kapav ouver.