CLAUDIUS: Oh Gertrude, Gertrude,
When sorrows come, they come not single spies,
But in battalions. ...
(Hamlet Act 4 sc 5)
KLODIOUS: Ayo Zertrid, Zertrid!
Problem nepli vinn enn par enn aster,
Zot vinn par grap. ...
(Prens Hamlet Ak 4 senn 5)
KLODIOUS: Bann nenport perdi bann dan karo-kann pe dir mwens ki 1% popilasion Repiblik Moris posed plis ki 80% larises Repiblik. Be pa samem so yes? Vila delix pe fer piti e bann groker zot zalou pe fermal. Bann gropoumon pe sem zizani, pe rod koken dibien lezot. Zot pe rod detrir travay bondie. Emosion dan ler; boukou emosion dan ler. Emosion tro for, ki pou fer Zertrid?
Bann nenport perdi bann dan karo-kann pe dir sipaki global warming pe fer piyaz. Zot divage, zot rabase, moulougande. Sa konsern pol nor sa. Nou nou dan tropik. Zot pe rod detrir travay bondie. Nou pa dan lil paradi, nou? Lor nanye ditou emosion tap pil. Ki pou fer Zertrid? Madann, Asok, Pravinn, Ajay pa dakor. Bizen swiv zot sazes!
Bann nenport perdi bann dan karo-kann dimann egalite jennder. Zot sem laenn, fer zom perdi pwen. Zot pe rod detrir travay bondie. Zot pe rod fer plis ki bondie. Bondie pa ti pran enn kot Adan pou fabrik enn Ev? Tro boukou emosion. Dir mwa Zertrid ki bizen fer? Enn sans Madann, Asok, Pravinn, Ajay pa dakor.
Bann nenport perdi bann dan karo-kann pe dir 50% zanfan apre 7 an dan lekol primer pa kapav swiv program ledikasion segonder dan kolez; 6,000 zenes pas HSC toulezan kan bizen minimem 12,000 toulezan. Zot pe dir bizen fer sipaki, sipakwa. Zot pe rod detrir travay bondie. Bon dimoun skandalize. Madann, Asok, Pravinn, Ajay pa dakor. Bon dimoun sa! Zot emosione. Ki pou fer Zertrid?
Bann nenport perdi bann dan karo-kann pe dir ki gardmanze pe bat lamok; katora pe fer grimas. Zot pe rod detrir travay bondie. Kapav kwar! Zot pe dir nou manz kat-kat friyapen? Latet pa bon. Madann, Asok, Pravinn, Ajay pa dakor. Zot ena rezon. Emosion dan ler; boukou emosion dan ler. Emosion tro for, ki pou fer Zertrid? ...
Dev Virahsawmy
27.07.08