Misie Premie Minis,
10.07.08
SSS La Gaulette, li enn ikonn kiltirel dan rezion lwes. Si konn itiliz li, nou pou kapav fer li vinn enn enstriman pou devlopman ek empawerment bann dimoun pov ki finn may dan lak soudevlopman.
Grasa SSS La Gaulette, bann zanfan ki viv dan sa rezion la pe kapav fer letid ki fer zot lorizon vinn pli larz posib ek lerla permet zot vinn profesionel dan diferan domenn.
Pou bann zanfan ki finn gagn problem ar CPE, li posib, dan bann klas PREVOK ki adopte program PREVOKBEK, donn bann zanfan defavorize enn nouvo sans pou gagn devlopman neseser pou fer fas problem ki pe chombo nou par likou.
Falepa ki lotorite leta Repiblik Moris kwar ki bann zanfan rezion lwes zis bon pou travay gardien, servant, weyter ek weytres dan lotel ek vila delix(sekter IRS). Si enn sant formasion neseser pou fer formasion vokasionel ek profesionel, li devwar leta idantifie lanplasman ki bizen me pa ferm enn lekol ki pe okip ledikasion plis ki 500 zanfan.
Fer atansion! Desizion gouvernman pou ferm sa lekol la li paret bien-bien golmal. Li bet fer Montagn Morn vinn patrimwann mondial e anmemtan detrir enn ikonn kiltirel presie pou bann AfroKreol.
Se pa fermtir lekol ki bizen me reform ki pou donn bann zanfan AfroKreol enn ledikasion balanse (nouvo politik langaz, reoryantasion pedagozik bann profeser, program ki donn zanfan posibilite swazir ki sime zot anvi pran pou zot lavenir ets.).
Bann neoliberal zot nek pans profi ek efikasite finansie. Me ou Dokter, kouma ou papa, ou enn social-demokrat. Ou pa kapav kwar ki bann zanfan AfroKreol zot zis enn enstriman pou fer larises gro lamone marse; zis enn roulman dan langrenaz kapitalis.
Performans skoler dan rezion lwes, li bien-bien ba. Bizen aksion afirmatif pou ki sa bann zanfan la gagn posibilite ek soutien pou sorti dan latrap povrete.
Nou kone nou lavwa feb pou tous ou santiman
Ar respe ki nou dwa ou,
Jimmy Harmon
Dev Virahsawmy
Marjorie Desveaux