Politisien dan gouvernman kouma dan lopozision pe sote-pile parski pri manze ek petrol pe bese. Sakenn pe rod montre ki kantite li kontan lepep; ki kantite li soufer kan vant lepep pe grogne. Dan gran gamat filwar koze zot rod fer nou bliye problem plis irzan, plis permanan ek plis danzere: GLOBAL WARMING. Enn kote ena Global Warming, lot kote resesion ekonomik mondial. Nou, nou kouma zanana. Kouronn pikan lor latet, dibwa pwent dan ...
Dabor nou get enn kou kifer pri pe bese. Dapre bann exper dan sa domenn la, resesion ekonomik ki pe vir lemonn anbalao li pe akonpagn enn lot fenomenn ki pou anpwazonn lavi ankor plis. Li apel DEFLASION. Si pri kontinie bese aktivite ekonomik pou nepli profitab e problem ekonomik pou agrave.
Ki nou bizen fer dan tousa? Aplodi ki pri pe bese e atann ki lavi dan Moris kout mwen ser? Gouvernman ek lopozision pe begn dan mem lozik kabose. Resesion ek deflasion pou met boukou sekter andifikilte, sirtou textil ek tourism. Mwens reset vedir mwens deviz pou enport manze. Pa bliye nou enport apepre 80% nouritir ki nou konsome.
Ki Gouvernman ek lopozision pe atann? Atann lafaminn rantre pou koumans rod solision? Bizen azir aster, pa dime! Nou bizen enn plan sirvi ki dirab pou Lil Moris Dirab.
Lakle sa plan dirab la se FRIYAPEN.
Pou prodir enn plant friyapen pa kapav sem lagren, met boutir dan later ousa fer proven. Bizen konn manipil so rasinn pou fer nouvo plant. Nouvo plant la pran 3-5 an pou koumans raporte. Savedir si nou'le vremem fer fas sitiasion difisil ki pe vinn ver nou, se deswit ki nou bizen met anplas nou plan sirvi.
1. Enn pie friyapen li raport anviron 200 fri par an pandan 50 an;
2. Ar enn bon manejment nou kapav ranplas vie pie par zenn pie e vie pie pou donn nou bon dibwa pou konstriksion lakaz e pou fabrikasion meb;
3. Fey friyapen li enn bon nouritir pou zanimo (betay, kabri ets.). Li pou ed nou dan devlopman lendistri dile, diber, fromaz;
4. Lapo pie friyapen donn enn lakol e li ena osi valer medisinal;
5. Bann exper panse ki friyapen konsom bien tigit dilo konpare ar pomdeter par ekzanp;
6. Mo konn enn exper ki panse ki plantasion friyapen pou donn nou karbonn kredit ki nou kapav vande e gagn deviz etranzer;
7. Kapav fer lafarinn friyapen; kapav manz li kouma nouritir debaz, fer kari ar li, prepar deser ar fri mir ets.;
8. Si konn fer so latay regilierman, kapav anpes pie friyapen vinn zean e lerla rekolt vinn pli fasil;
9. Dan Hawaii boukou resers finn fer e pe fer pou fer pie friyapen raporte 12 lor 12;
10. Resers pe avanse pou frigorifie friyapen e konserv enn stok pou letan dir.
1. Gouvernman bizen dimann AREU koumans prodir tiplant friyapen e met dibout enn lekip spesial pou enform, motiv ek ed dimoun dan plantasion ek tretman pie friyapen;
2. Bizen ankouraz sak fami ki ena enn bout lakour plant enn pie friyapen;
3. Met dibout enn lekip siyantis ki fer resers lor friyapen;
4. Partou kot kapav, plant pie friyapen de kote sime. Konsiatiz popilasion pou ki zot protez zot patrimwann.
5. Ankouraz bann sef ek nitrisionis explor diferan fason itiliz friyapen ets.
Pa gagn drwa mordefen dan Moris. Nou kapav prodir enn bon parti manze ki nou bizen. Me li osi neseser ki nou sanz nou labitid. Pou reysi fer li, bann lider ekonomik, politik, relizie, sosial ek kiltirel ena enn gran chalenj. Eski zot ena gabari neseser? Lavenir pou dir nou.
27.11.08