PAR ENN 22 MALELVE
©Dev Virahsawmy
Ooh MAHAGOUROU Pirsan, Lider Maximo bann Pirnas,
Gran Profeser dan liniversite Lamerik,
Pardonn enn ti 22 ki finn ena lodas depi plis ki 40 an
Fer resers lor Kreol Morisien,
Ki finn oze ekrir an Kreol Morisien
Kan bann plis pirsan parmi bann plis pirnas
Dan zot gran sazes
Ti dir Kreol Morisien li enn patwa dezenere.
Pardonn enn ti 22
Ki finn oze tradir "HABANERA"
An Kreol Morisien pou fer lemonn kone
Ki kapav servi Kreol Morisien pou sant sante klasik,
-Kapav kwar! Sant Bizet an Kreol!
Pardonn enn ti 22 ki finn oze ekrir enn od
Pou sant bote sega
-"ENN OD POU NOU SEGA"-
E finn dimann enn lot 22, Sanedhip,
dir poem la ar boukou emosion.
Pardonn enn ti 22
Ki pa ena enn lot langaz pou sant so soufrans ek so lespwar.
Pardonn enn ti 22
ki pa konn servi Telegou
pou dir
"Lasours la li ankor lwen,
Bien-bien fre, bien-bien kler,
Lasours kot nou tou pou al bwar."
Pardonn enn ti 22 ki pa finn dimann enn so bann
Pou sant 'Lasours'.
Pardonn Veronique ki finn oze donn so lavwa meveye,
So talan mazik,
pou fer poem enn ti 22 fer 1000 leker vibre
Enn Lendi swar dan Sitadel.
Ooh MAHAGOUROU Pirsan, Lider Maximo bann Pirnas,
Gran Profeser dan liniversite Lamerik,
Pardonn enn ti 22 ki finn konstrir enn program skoler
Pou ed zanfan Moris sorti dan prizon lignorans
Atraver zot lang maternel,
KREOL MORISIEN.
Zordi gramaten mo pe tranble
parski tanto
Ooh MAHAGOUROU Pirsan, Lider Maximo bann Pirnas,
Gran Profeser dan liniversite Lamerik,
Dan sware poezi
Mo finn oze aksepte
Less detrwa zenn Morisien
Lir detrwa poem ki mo finn ekrir an Kreol Morisien.
Parmi
O Sakrilez! O Blasfem!
Mo finn oze dir ki dan mo kiltir ena
"TAMTAM, GITAR EK SITAR"
-Degoutan kiltir Endo-Ero-Afriken!
Ooh MAHAGOUROU Pirsan, Lider Maximo bann Pirnas,
Gran Profeser dan liniversite Lamerik,
Pardonn enn ti 22 ki finn fer otan pese.
Mo pli gran pese
Se ki mo kwar e mo pou kontinie kwar
Ki dan kreolite ena
Lang Kreol Morisien,
Ena Metisaz,
Ena Sega,
Ena Morisianism.
Lendi 8 Desam dan Sitadel
Tousa ti prezan dan enn bouke larkansiel.
Mo ti trouv tousa.
Me mo kone mo antor.
Mo zis enn ti 22.
Pardonn mwa!
Si ou pardonn mwa mo sir
Sen Pier pou donn mwa enn sans.
Sinon?
Lanfer mo plas.
11.12.08