Plan gouvernman pou fer fas sitiasion ekonomik dramatik dan lekel nou ete finn provok plizier kalite reaksion. Ena ki trouv li korek; ena ki trouv li bien maf; ena ki panse ki li lor balans 50/50; ena pa kone ki pou panse.
Mo panse ki enn eleman vital pou ed enn pep fer fas difikilte se fakter kiltirel. Premie Minis ek so Minis Finans finn fokes net lor solision materyel e akoz sa zot finn pas gomelastik lor dimansion kiltirel ek sikolozik. Apart renovasion Plaza peyna nanye lor kontribision lar ek kiltir.
Kan enn pep dan tourman li bizen distraksion. Normal zot pou get plis televizion ek DVD. Me nou bizen anpes dimoun vinn LOS LOR KANAPE (couch potato). Ki kapav fer pou anpes sa? Olie senp konsomater bizen fer zot vinn kreater e rant dan enn relasion enteraktif ar lezot. Bizen ankouraz dimoun dan kartie ek dan vilaz mont zot prop spektak kot artis ek piblik ankominion. Bizen ankouraz dimoun servi lar ek lekritir pou zot dir zot soufrans ek zot lespwar atraver poem, sante, skech komik, pies-teat, tizistwar ets. Enn travay formasion ek ankadreman li neseser.
Nou anvi, nou pa anvi, pou ena dimoun ki pou perdi plas. Pou sa bann dimoun la, pou bizen enn formasion pou permet zot adapte. Enn bon kantite travayer, sirtou bann madam, zot pa posed literesi ek nimeresi e akoz sa zot pa kapav benefisie foul-foul konesans neseser pou fer fas lavi dan lemonn modern. Bizen met dibout enn program formasion pou ki sa bann adilt la aprann lir, ekrir, konte dan zot lang maternel e anmemtan gagn enn konesans bazik Angle pou ki zot kapav benefisie kouma dwatet formasion dan IVTB. Lor vites nou kapav adapte program PREVOKBEK ek met dibout enn kour bileng Kreol Morisien/Angle pou fasilit resiklaz bann travayer ki perdi plas. Anplis Madam Saskia Virahsawmy-Naidoo finn mont enn kour kontabilite an Kreol Morisien ki nou kapav servi pou form bann travayer ek bann ti-antreprener.
Ena ki kwar ki sitiasion kriz la pou fonn vit; ena ki panse ki li pou ale mem pandan enn long peryod. Li enportan osi ki nou pa bliye ki nou pou bizen osi fer fas 'Global Warming' ki sirman pou afekte prodiksion manze dan lemonn. Pou viz sekirite alimanter dan nou pei li pa pou ase zis prodir plis manze. Nou pou bizen osi sanz nou labitid alimanter. Sa li dimann enn sanzman kiltirel enportan. Nou bizen elabor enn program formasion, sansibilizasion ek motivasion parski pa kapav atann toufann vini pou al rod solision e konstrir selter.
Pou so prosenn konferansdepres PM bizen dimann Minis ledikasion ek kiltir osi prezant so program pou fer fas imerjennsi.
Dev Virahsawmy
22.12.08