LET OUVER POU ENN VIE KAMARAD
Mo bon vie kamarad Jean-Claude de l'Estrac,
Mo finn lir ar boukou lentere to editoryal dan l'Express Dimanche 02.03.08.
To ena rezon dir ki ant nesans ek senk an enn zanfan pov akimil boukou andikap;
To ena rezon dir ki ler nou refiz donn zanfan drwa servi so lang maternel pou li devlope emosionelman ek ramas nouvo konesans nou fer enn gran dega dan so latet;
To ena rezon dir ki sosiete bizen pran responsabilite okip zanfan pov pou prepar li pou al lekol primer;
To ena rezon dir ki bizen lakres, gardri ek lekol maternel bon kalite pou sa bann zanfan la;
To ena rezon dir ki bizen bann profesionel konpetan pou okip sa bann zanfan la.
Permet mwa azout detrwa ti reflexion.
Kan baba la ankor dan vant so mama, bizen okip li. Bizen nouri mama la bien pou ki li kapav nouri so tibaba. Bizen sir ki mama la pa pe sibir toutsort kalite violans ki normalman baba la santi dan vant so mama apartir enn serten moman dan so devlopman.
Bizen ki bann depite, konseye minisipal, konseye distrik ek konseye vilaz idantifie bann pos povrete e laba leta bizen konstrir bann batiman pou abrit bann lakres, gardri ek lekol maternel. Bizen donn pouvwar bann komite kartie pou protez landrwa la kont vandal e anpes bann BMWala ek Mersedeswala fer lake pou depoz zot zanfan laba. Pa bliye ki bann ki posede pou aste ou lwe lakaz pre ar enstitision la pou gagn drwa profit nouvo fasilite.
Pandan ki bann zanfan la dan lakres, gardri ek lekol maternel, bizen donn zot nouritir, lenz ek materyel pedagozik apropriye.
Bann ki travay dan sa bann plas la bizen bien kalifie. Par ekzanp bann profeser lekol maternel dan pei Skandinav (ki to finn mansione dan to lartik) zot extra kalifie e zot tous plis ki profeser kolez ek lekcherer liniversite.
Bizen ki bann travayer sosial ankadre bann paran pou ki dan lakaz, travay lekol kontinie.
Anmemtan bann lekol primer dan rezion defavorize bizen renove ek reforme pou ki zot kapav akeyir, kouma bizen, sa bann zanfan la.
Kouma pou finans sa?
Pou twa Rs 12 milion ki pou ekonomize ler sible pansion vie dimoun ki souvan bizen sa kas la pou aste meksinn, li pou ase. Pa dakor kamarad Jean-Claude!
Si ogmant korporet tax par 5%, leta pou gagn omwen Rs 200 milion.
Bann vila IRS zot pridevant mwayen li apepre Rs 20-25 milion enn. Enn tax 10% lor sa 'windfall gains' la pou donn leta omwen Rs 2 milion par vila. Dapre plan gouvernman pou ena 5000 vila. Total: Rs 10 miliar.
Moris kapav vinn enn Repiblik ki pran kont so zanfan. Olie pens detrwa malere roupi dan pos bann ki pe tir jab par lake, nou dimann bann ki pe fer gro fortinn donn enn koudme. Finalman se zotmem ki pou plis benefisie parski pou ena stabilite, lape sosial e bann ki pou rant dan marse travay pou plis konpetan, plis entelizan e pou zwir enn meyer lasante. Kouma nou ansien kamarad kontan dir: "Enn solision win-win."
Ar lamitie ek respe,
Dev Virahsawmy
03.03.08