Dan Moris ena 3 kalite rasism:
Rasism blan kont tou leres. Dapre zot ideolozi, zis blan ki konn fer devlopman dan pei e pou propaz zot prezize zot servi bann EroKreol, sirtou bann milat, pou montre zot swadizan siperyorite. Zot fer sa pou fer kwar ki li normal ki detrwa fami gran blan posed e kontrol 70-75 % larises Repiblik Moris. Zot osi servi relizion e fer kwar ki Bondie ena seve blon ek lizie ble.
Rasism anti-malbar. Serten politisien yer ek zordi servi sa rasism la pou fer kwar ki si bann AfroKreol dan pens (deryer midi) se akoz bann 22. Anverite bann desandan esklav ek kouli zot toulede ti sibir diktatir gran blan ede par bann EroKreol. Bann desandan kouli finn reysi sap dan tanay me bann AfroKreol finn tase. Kifer? Bizen ki bann istoryen ek sosiolog fer resers pou ed nou konpran sa.
Rasism anti-AfroKreol. Parmi bann Endou ena enn group sekter ki finn devlop enn rasism anti-AfroKreol. Ena dan nou pei enn tandans pou asosie AfroKreol ar delenkans ek krim. Se seki nou kapav apel KRIMINALIZASION ETNIK - bann nwar dan Langleter ek USA soufer mem difikilte.
Bizen kontinie demokratiz lekonomi. Enn reform agrer li endispansab pou konpans bann desandan esklav. Si nou ankadre bann AfroKreol e ed zot rant dan prodiksion alimanter modern, nou pou ed zot gagn dinite ki neseser pou konstriksion enn repiblik solider ek zenere kot dimoun viv kouma dimoun. Bizen ed bann artizan AfroKreol mont zot prop biznes. Si nou donn zot formasion ki bizen (ekrir zot lang maternel, aprann gard kont, fer enn devi ets) zot nepli pou les lezot explwat zot. Ler zot vinn antreprener zot prestiz pou ameliore e dimoun pou plis respe zot.
Lang ansestral bann AfroKreol bizen rant dan lekol primer kouma enn size parey kouma Hindi, Urdu, Tamil ets. Tou bann lang ansestral finn fini rant dan lekol. Li enn gran enzistis ki lang ansestral bann AfroKreol ki reprezant 25% popilasion Moris li touzour absan dan program lekol.
Si nou pa reysi konbat sa trwa rasism la zame nou pou reysi konstrir enn nasion Morisien, enn repiblik solider ek zenere.
09.10.09