BILBORD EK VIOLANS SEXIEL

Ena ansemoman lor bilbord enn piblisite ki fer promosion enn bwason ki donn lenerzi. Get li bien pou ou kapav deside si so zimaz ek so slogan zot apropriye.

Ena zimaz enn fam bien zoli ek sexi ki pe ouver top so traksout e ant so de tete ena enn kann labwason ki donn lenerzi. Me pa kwar sa zimaz la inosan. Anverite li fer eko enn zimaz ase kouran dan foto ek fim porno kot plas enn penis ant tete enn fam. Mo panse ki par expre pe sikzer ek explwat bann fantasm maskilen ki konsider lekor fam kouma enn bwat maja pou zwisans zom.

Tex ki paret dan piblisite la konfirm seki mo pe dir. Mo tradiksion so tex ki an Angle donn sa rezilta la: "Ouver pou les bebet la sorti." Peyna okenn dout! Ena boukou asosiasion sexiel dan tex ek zimaz. An limem sa pa sokan si pran li kouma enn jok. Me li pa enn jok e si konsepter la finn rod montre so vizion komik, mo bien sori pou dir ki li finn zis montre so move gou. Li kler ki mesaz ki pliblisite la pase se ki sex enn zafer violan, brital e bestial (kouma souvan ena dan fim porno).

Kliyantel ki pe vize se bann zenn. Ki pliblisite la pe dir bann zenn? Sex li pa enn expresion lamour, santiman, tandres me enn manifestasion virilite, ensten bebet, lespri macho. Dan enn peryod kot violans sexiel enn veritab problem bann azans piblisite ek bann media ki plibliy sa piblisite la bizen fer atansion. Pa akoz detrwa roupi nou agrav enn problem sosial ek kiltirel.

Pli vit ki kapav bizen tir sa bilbord la.

13.08.09