Peyna okenn dout. Michael Jackson ti enn zeni. Zeni artistik, mizikal, ladans. Me li ti enn bien move model pou lazenes.
Li enn senbol rev Ameriken ki finn vinn kosmar. Ala enn imen ki ti vinn marsandiz dan moul marketing modern; li nepli ti dimoun me enn prodwi konsomasion ki ti fini perdi so idantite imen. Li ti ni nwar, ni blan, ni zom, ni fam. Li ti vinn enn mark, parey kouma ena mark savon, mark parfen, mark loto. So lavi nepli ti realite. Li ti vinn fiksion.
Nou temwen lafen trazik enn zeni ki (kouma Dokter Faust?) ti perdi so nam dan langrenaz enn sistem ki konn enn sel zafer: paysa, paysa, boukou, boukou paysa.
29.06.09